Husi partidu ualu provizóriu ne’ebé rejistu, kompostu husi partidu koligasaun iha tolu no partidu lima seluk la’o mesak.
Partidu sira ne’ebé tama iha koligasaun mak hanesan Aliansa Mudansa ba Progresu (AMP) ne’ebé kompostu husi Congresso Nacional Reconstrução Timor-Leste (CNRT), Partidu Libertasaun Populár (PLP) no partidu Kmanek Haburas Unidade Nasional Timor Oan (KHUNTO).
Koligasaun seluk mak hanesan Frente Dezenvolvimentu Demokrátiku (FDD) kompostu husi Partidu Unidade Dezenvolvimentu Demokrátiku (PUDD), União Demokrátiku Timorense (UDT), Frente Mudansa (FM) no Partidu Dezenvolvimentu Nasionál (PDN).
Partidu koligasaun ikus liu maka Movimentu Sosiál Demokrátiku (MSD) ho kompozisaun husi Partidu Liberta Povu Aileba (PLPA), Movimentu Libertasaun Povu Maubere (MLPM), Asosiasaun Populár Monarkia Timorense (APMT) no Unidade Nacional Democrática da Resistência de Timorense (UNDERTIM).
Nune’e, partidu lima seluk ne’ebé deside atu la’o mesak mak hanesan partidu Frente Revolusionáriu Timor-Leste Independente (FRETILIN), Partidu Demokrátiku (PD), Partidu Republikanu (PR), Partidu Esperansa Povu (PEP) no (Centro Acção Social Democrata Timorense (CASDT).
Prezidente (CNE), Alcino de Araújo Barris hateten, husi lista provizória ne’ebé tama iha partidu ualu maka ofisialmente rejistradu ona.
“Iha partidu 21 maka CNE rejista no halo rezumu katak partidu ualu mak konkorre iha eleisaun antesipada”, tenik nia, iha servisu fatin, Kolmera-Dili, horisehik.
Partidu polítiku sira ne’ebé atu forma koligasaun ninia data limitasaun remata ona ina 11 Marsu 2018. Ne’e duni, CNE sei la simu inskrisaun husi partidu koligasaun.
Nune’e, ba partidu polítiku sira seluk ne’ebé hakarak rejistu hodi la'o mesak ba konkorre iha eleisaun antesipada ninia data limitasaun to’o 21 Marsu 2018.
