Prezidente CNE, Alcino de Araújo Barris hateten, sira simu keixa katak bloku koligasaun AMP hahú halo propaganda eleitorál ba públiku liuliu iha munisípiu sira. Tanba ne’e, lei eleitorál proibidu ba partidu polítiku sira hodi halo kampaña antes to’o iha loron ne’ebé determinadu ona.
Bainhira CNE hetan faktu ruma, sei bolu sira halo investigasaun, nune’e hatene motivu saida mak koligasaun sira ne’e hahú halo propaganda polítika.
“Maibé sekarik ba oin mak iha indikasaun ruma sira halo propaganda eleitorál la’ós iha sede ka fatin ne’ebé destinadu, klaru CNE sei halo investigasaun para atu apura verdade ne’e iha ne’ebé”, dehan Alcino, iha knaar fatin, Kolmera-Dili, horisehik.
Nune’e, iha elementu balun husi koligasaun FDD hahú taka sticker koligasaun FDD nian iha fatin públiku sira, iha Munisípiu Manufahi. Ne’e duni, CNE bandu ba parpol sira labele taka sticker iha fatin públiku sira.
Ho aktu hirak ne’e CNE koordena ho Komandu PNTL munisípiu hodi hamoos hotu sticker partidu FDD nian iha sinais tránzitu.
Nia esplika, elementu parpol balun mak viola erru sira ne’e CNE sei koordena ho PNTL kaptura hodi loke prosesu investigasaun.
Nune’e, reprezentante AMP, Arão Noe de Jesus hateten, iha keixa balun husi partidu polítiku balun mak keixa ba CNE katak AMP halo komísiu iha aldeia balun hodi dada bandeira no pre-kampaña.
Tuir nia, koligasaun AMP ne’e kompostu husi CNRT, PLP, KHUNTO, presiza halo sosializasaun partidu nian hodi dada bandeira iha aldeia no suku. Tanba ne’e, iha informasaun balun AMP halo mini kampaña eleitorál iha nivel aldeia.
Maibé, Arão dehan, atu haforsa estrutura iha baze hodi hasoru eleisaun antesipada, presiza iha konsolidasaun massa husi partidu tolu ne’e hodi haforsa estrutura iha baze.
Entretantu, membru koligasaun FDD, Abonu Ramcabean, rejeita totál sticker FDD nian ne’ebé taka iha munisípiu la'ós militante no simpatizante FDD nian, maibé pesoál datoluk husi partidu seluk mak halo ajitasaun hakarak hafo'er imajen koligasaun ne’e nian.
Nia dehan, koligasaun ne’e foin mak hahú konsolidasaun hodi halibur massa hodi prepara ba eleisaun antesipada, maibé kona-ba mini kampaña ne’e rasik FDD to’o oras ne’e seidauk autoriza militante sira halo propaganda polítika iha komunidade nia leet.
