Portavós MUTL, Miguel Arcanjo hatete, sira-nia pozisaun maka kontra ba leilaun karreta prado no kontra sosa karreta foun ho marka prado.

“Ami nia pozisaun ami kontra leilaun prado ami kontra mós sosa karreta foun”, dehan nia, iha Kampus UNTL Liceu, horisehik.

Desizaun foun ne’e bankada lima iha Parlamentu Nasionál halo sees malu ho saida mak deputadu anteriór sira halo hodi entrega hotu karreta sira ne'e ba deputadu foun sira hodi utiliza ezerse sira nia funsaun.

Ne’e duni, tuir Miguel, hatudu ba povu katak partidu polítiku sira ne’e hanesan lixu. Tinan lima mai tan di'ak liu lalika vota, tanba sira mesak grupu mafiozu no lohi-teen.

“Bainhira povu maka moris aat hela de’it nasaun nia dignidade tau iha ne’ebé? Lei fó previlijiu ba sira”, tenik nia.

Nia reforsa, kria klase-klase sosiál iha sosiedade sira nia leet, tanba sira mós sosiedade kontestu demokrasia ne’e husi povu ba povu no fila-fali ba povu, bainhira sira fila-fali ba povu sira lakohi halo sira nia-aan hanesan povu.

Nune’e, nia hatete, sira tenke asegura lei balun atu halo klase entre sira ho sosiedade sira seluk. Tanba ne’e, kondisaun no situasaun Timor ninia agora daudaun ne’e interese nasionál iha PN lakon tiha ona.

“Ba kazu prado ninia MUTL sei organiza fila-fali ita nia kolega sira seluk atu ita tetu to’ok kondisaun ho situasaun. Depende bainhira situasaun ho kondisaun permite ba ami atu halo ne’e ami halo”, nia Miguel.

Nia dehan, votasaun ba unanimidade prado foun ne’e justifika no hatudu ba povu katak, sira durante ne’e la'ós reprezenta povu, maibé durante ne’e reprezenta sira-nia família.

Antes ne’e bankada parlamentár lima ne’ebé oras ne’e daudaun iha Uma Fukun Parlamentu Nasionál, liu husi reuniaun Konsellu Administrativu fó votu unanimidade ba sosa karreta foun ho marka Prado, iha Sesta (22/9).

Konsellu Administrativu Parlamentu Nasionál nian reprezenta husi kada bankada. Husi Partidu FRETILIN reprezenta husi deputadu Aurélio Freitas, CNRT Deputada, Brígida Correia, PLP Deputadu, Mericio Akara, PD Deputadu, Manuel Carvalho ‘Lito Rambo’ no reprezentante husi bankada KHUNTO.

Fonte prinsipál diáriu ne’e nian iha Parlamentu Nasionál hateten, iha prosesu diskusaun no votasaun ne’e pontu rua importante mak deputadu sira define. Kona-ba kontinuasaun alienasaun ba karreta Prado antigu.

Maski nune’e, karreta sira ne’ebé deputadu anteriór sira lori ona ba uma sei rekolla hotu, hafoin bele halo analiza hodi define ninia presu ne’ebé razoavel. Presu ne’ebé determina entre $12.000 to’o $20.000.

Pontu importante seluk ne’ebé aprova maka reprezentante bankada sira ne’e hotu-hotu a favór ba sosa karreta foun.