Observador CNE Munisipiu Vikeke, Marcal da Cruz hateten, CNE nota katak mini kampania ne'ebe hala'o iha suku Babulo, Uatolari no Suku Irabe'en de baixo, Uatocarbau lao hakmatek tanba, partidu koligasaun ne'e kumpre orariu kampaña.
Maski nune'e, nia dehan, iha Uatolari ho Uatocarbau militante no simpatizante husi partidu seluk partisipa hotu iha mini kampania ne'e hodi pona programa maibe la halo asaun fiziku ruma tanba militante sira husi partidu seluk kopera malu diak ho autoridade siguransa ho defeza.
"Ami nia hare'e mini kampania AMP halo iha Uatolari ho Uatocarbau lao hakmatek tanba aliansa sira kumpri orario kampania nian iha suku rua ne'e," dehan Marcal, iha Uatocarbau, horisehik.
Nia dehan, observasaun ne'ebe CNE haree iha labarik minoridade la’os sira mak hakarak, maibe inan-aman sira bolu hodi partisipa mini kampania ne'e, maibe la partisipa ativu no la kaer atributu aliansa nian hodi hala'o halo konvoiu iha mini kampaña.
Kona-ba funsionariu publiku sira ne'e kompetensia CNE ho KFP mak halo observasaun, maibe fiar katak funsionariu sira rasik la partisipa ativu iha kampania ne'e tanba atividade servisu publiku diariamente lao hela.
Observador CNE hateten, durante mini kampania AMP nian destaka iha Munisipiu Vikeke lao diak, tanba PNTL ho F-FDTL halo koperasaun diak hodi asegura masimu iha fatin risku sira, liliu iha Vikeke rasik nune'e labele akontese perturbasaun.
Tanba ne'e, fiar katak, komisiu boot AMP ne'ebe mak sei akontese iha Sabadu 5 Maiu sei hakmatek tamba durante mini kampania iha Vikeke rasik la iha sinal hodi mosu konfrontasaun entre militante AMP ho partidu seluk.
Iha observasaun, diariu ne'e kobre mini kampania AMP nian ne'ebe hala'o iha Uatolari ho Uatocarbau partisipa militante iha postu administrativu rua ne'e kuaze militante atus rua resin.
