Nia esplika, ministru foun ne’e mínimu liu tenke komprende saida mak militár. Agora tau fali ema ne'ebé mamuk loos ho vida militár halo ulun moras liu.

“Se mai ema ida hanesan Taur ou katuas Xanana entaun ha’u bele dehan ida ne’e cocok duni”, dehan nia, iha edifísiu Kuartél Jerál F-FDTL, Fatuhada, horisehik.

Komandante Jerál F-FDTL ne’e esplika, ministru defeza la presiza mai husi FALINTIL, maibé ema ne’e komprende kona-ba militár nian.

“Ha’u rona katak Taur mak sei asume pasta nu'udar Primeiru Ministru. Nia bele akumula. Ha’u nia hakarak defeza-seguransa ne’e iha ministru ida de’it nia okos”, tenik nia.

Ministru ida maka asume kargu rua ne’e para bele lori nafatin instituisaun rua ne’e sai maun-alin. Nune’e, ofisiais sira tenke hasoru malu atu bele adapta malu labele kria inimigu ba malu.