Nia dehan, governu forma ona, reuniaun Konsellu Ministru funsiona hodi propoin Filomeno Paixão ba Ministru Defeza. Ne’e duni, funsionamentu governu la’o normál maibé membru governu maka la kompleta.

“Se Primeiru Ministru maka laiha karik ne’e ita bele dehan katak governu seidauk forma, agora Ministru mós balun iha ona, Sekretáriu Estadu mós iha ona ne’ebé saida maka seidauk iha”, akresenta Lere.

Tanba ne’e, tuir nia, kanselamentu Prezidente Repúblika ba Portugál ne’e diplomatikamente iha reflesaun ida ne’ebé negativu.

Antes ne’e, Parlamentu Nasionál liu husi kinta lejizlatura la autoriza dezlokasaun Presidente Repúblika (PR), Francisco Guterres ‘Lú-Olo’, hodi halo viajen ba nasaun amigu ne’ebé uluk fó apoiu ba prosesu luta libertasaun nasionaliza no iha faze konstrusaun Estadu ida ne’e.

Tuir Konstituisaun bainhira Xefe Estadu viajen ba estranjeiru tenke iha deliberasaun husi PN hodi fó autorizasaun. Tanba ne’e, liu husi sesaun plenária maioria deputadu sira kansela ona viajen PR Lú-Olo nian ba Portugál liu husi votasaun kontra 35 no afavor 29, nune’e dezlokasaun ne’e kanseladu.

Presidente Bankada Partidu Demokrátiku (PD), António da Conceição hatete, vizita Estadu Prezidente Repúblika ba Portugál ne’e importante tebes, tanba bele halo lasu amizade entre governu no povu rai rua ne’ebé kuaze kultura no polítika atu hanesan.

Nia hatutan, situasaun iha rai laran la’o di'ak hela laiha situasaun ne’ebé emerjénsia. Tanba ne’e, tenke kansela viajen ne’e hodi Xefe Estadu la kumpre konvite husi Portugál.

Iha fatin hanesan, tuir deputadu Francisco Vasconcelos hatete, haree ba situasaun polítika interna, kuandu formasaun VIII Governu Konstitusionál sei pendente hela, la hataan Xefe Estadu sai ba estranjeiru.

Iha momentu ne’e povu no nasaun presiza Xefe Estadu nafatin iha rai-laran, hodi hatudu nia bele hatán ba responsabilidade konstitusionál ne’ebé iha nia kabas leten, hodi mós kontribui ba estabilidade polítika, governativa Estadu nian.