Ministru Reforma Lejizlativa Asuntu Parlamentár, Fidelis Magalhães Leite hateten, AMP hakarak mantein kompromisu durante kompañia eleitorál ne’ebé planu dada kadoras mina matan Greater Sunrise hodi esplora iha Timor Leste.
Nia dehan, programa prinsipál Governu nian mak dezenvolvimentu infraestrutura, ekonomia, dezenvolvimentu kapitál sosiál, ho konsolidasaun Governativa no kombate korrupsaun iha rai laran.
“Governu iha kompromisu no vontade tomak atu implementa kompromisu sira durante kompañia eleitorál”, dehan nia, iha Palasiu Governu, horisehik.
Nia dehan, durante ne’e Governu AMP defende makaas planu hadau mina matan Greater Sunrise atu esplora mina ne’e iha Timor Leste, nune’e dezenvolvimentu industriál mina iha Timor-Leste buras liután.
Ne’e duni, iha Governasaun ne’e sei reflete hikas kompromisu, programa dada kadoras ne’e rasik sai materiál importante ba Governu hodi atinji objetivu ne’ebé durante ne’e hala’o ona.
Entertantu, Ministru Fidelis hatutan, iha 2019 Governu hakarak konsentra dezenvolvimentu fíziku no naun fíziku ne’ebé planeia ona iha programa Governu.
Nia dehan, iha OJE 2018 Governu seis tau prioridade hodi selu dívida sira, antes ne’e Governu anteriór tula hela ba VII Governu no VIII Governu atu selu dívida sira ne’e.
Tuir nia, bainhira Governu la selu dívida mak programa Governu la implementa tanba Governu foka liubá dívida, maibé iha oportunidade ne’e Xefe Governu apela ba membru Governu tomak hodi haree prosesu administrativu nune’e finaliza lalais dívida.
