Prezidente PN, Arão Nóe de Jesus hatete, VIII Governu propoin ona kandidatura ba komisáriu Komisaun Anti Korrupsaun KAK ho pakote úniku, tanba ne’e deputadu sira propoin hodi aprezenta pakote rua. Tanba ne’e, governu aprezenta ona kandidatura sira mai iha PN, maibé deputadu sira husi Bankada FRETILI deside abandona plenária.

Ne’e duni, la prienxe kuorum dois tersu (2/3), nune’e Presidente PN deside kansela eleisaun ba Komisáriu KAK no adia fali ba loron seluk.

“Hili komisáriu ne’e designadu husi Parlamentu Nasionál no hetan proposta husi governu, maibé iha kuorum pelumenus deputadu prezente 49”, dehan nia, iha Uma Fukun PN, horisehik.

Iha fatin hanesan, Deputadu FRETILIN, Joaquim dos Santos hatete, prosesu eleisaun ba Komisáriu KAK proposta obrigatoriu ne’e tenke mai husi governu atu labele aprezenta kandidatu ne’ebé iha duvida.

Nia hatutan, kandidatura ne’ebé ohin iha ne’e governu mak propoin, maibé aprezenta kandidatura rua ne’e duvida boot ida ba polítiku na’in sira.

“Ami haree proponeten ida husi governu, maibé aprezenta kandidatura na’in rua ne’e duvida boot. Tanba ne’e, ami sai husi sala plenária hodi lakohi tuir eleisaun”, tenik Joaquim.

Hataan ba preokupasaun ne’e, Prezidente PN, Arão Noe hatete, preokupasaun Bankada FRETILIN nian ne’ebé atu buka konsensual figura sei komunika ba governu atu toma konta.