Sekretáriu Jerál partidu FRETILIN Mari Alkatiri dehan, Veteranu no antigu kombatente iha munisípiu barak mak seidauk rejistu no simu osan tanba failla iha komisaun omenajen.
“Balun oan veteranu ona, maibé aman ho inan seidauk hetan veteranu tanba aman ho inan FRETILIN oan asvezes bosok sira katak partidu seluk”, dehan nia iha kampaña ho tipu diálogu ho povu postu administrasaun Iliomar-Lautem, Domingu (09/07).
Kaer ukun, Alkatiri dehan, FRETILIN hakarak atu veteranu hotu-hotu simu osan liu husi harii komisaun omenajen foun atu rejista naran veteranu ne’ebé seidauk tau naran no tau naran ona ,maibé seidauk simu osan. Polítika FRETILIN hakarak komisaun omenajen rejista naran no avaliasaun tenke prosesa kedan pagamentu atu labele hein too mate de’it mós la simu.
“Balun dehan FRETILIN mak ukun veteranu no antigu kombatente sira la simu osan ne’e bosok imi de’it”, dehan SekJen FRETILIN ne’e.
Tanba, Alkatiri dehan, FRETILIN hatene buka osan no hatene uza osan no hatene fó dignidade ba ema sira ne’ebé luta ukun rasik aan.
Programa FRETILIN, nia informa, rezolve osan ba veteranu no ferik katuas la’ós atu obriga ema sira atu tama iha partidu A ka B mak foin rezolve nia direitu.
FRETILIN sei bandu komisaun omenajen sira atu husu ba veteranu no ferik katuas sira nia partidu , maibé ne’e direitu veteranu tanba nia luta no ferik ho katuas nia idade ona.
