Antes ne’e, Jurista timoroan, Manuel Tilman hatete, estabilidade governasaun Aliansa Mudansa ba Progresu (AMP) nian iha FRETILIN ‘nia-liman’, kuandu iha diskusaun programa ka orsamentu maka opozisaun walk out ne’e sei hamosu problema.

Maski nune’e, tuir Vise-Prezidente partidu FRETILIN, Francisco Miranda Branco hatete, nasaun ne’e nia destinu iha timoroan rasik nia liman, tanba ne’e ba sosiedade hotu-hotu labele halimar hodi halo desizaun ba futuru nasaun nian.

“Buat ne’ebé jurista sira interpreta ne’e la loos, FRETILIN sei la halo walk out, maibé buat ruma ne’ebé iha nesesidade kuandu partidu deside halo ida ne’e ami sei halo tuir polítika partidu nian”, dehan nian, iha Uma Fukun PN, horisehik.

Branco hatutan, atu halo desizaun ruma ba futuru nasaun nian presiza kuidadu no tuir duni konstituisaun, tanba nasaun ne’e sei nurak desizaun sira hanesan ne’e la'ós atu deside futuru nasaun nian agora kedas.

Iha momentu ne’e partidu deside-aan sai opozisaun iha PN hodi halo korresaun ba governasaun AMP nian, tanba ne’e FRETILIN sei sai opozisaun ida ne’ebé tuir duni lala’ok opozisaun nian.

Tanba ne’e, prosesu tomak tenke hatuur tuir regra konstitusionál, norma legál no rejimentál ne’ebé hatuur ona iha Parlamentu Nasionál.