Membru Comité Central FRETILIN, Maria Angélica Rangel hatete, partidu FRETILIN konsege produs programa 6H no ida ne’e sai hanesan kompromisu eleitorál partidu ba povu sira.
Programa ne’e konvense duni povu eleitór sira iha eleisaun parlamentár primeira ronda. FRETILIN konsege hetan vitória, maibé tanba polítika tenke fila-fali ba povu atu deside.
“Estrutura nasionál to’o baze kontinua servisu makaas konsolida polítika partidu nian ba povu tomak liu husi programa 6H ita sei hetan vitória dala ida tan”, dehan Angélica, iha Suku Santa Cruz, horisehik.
Kampaña ba eleisaun antesipada ne’e partidu FRETILIN sei kontinua konsolida programa VII Governu nian, ne'ebé hetan rejeisaun husi bloku opozisaun Aliansa Maioria Parlamentár (AMP).
Ne'ebé iha programa sira ne’e foka liu ba infraestrutura bázika, saúde, edukasaun, agrikultura no sira seluk.Ne’e duni, FRETILIN fiar katak ho programa sira ne’e fó duni benefísiu ba povu no nasaun.
Intelektuál FRETILIN halo ona estudu barak ba programa 6H bainhira implementa karik nia benefísiu ba povu ne’e oinsá FRETILIN iha kapasidade atu jere.
Membru CCF ne’e halo komparasaun dezenvolvimentu infraestrutura iha Oekusi di'ak liu Dili laran, tanba tinan sanulu investe biliaun $12, maibé ke’e kuak taka kuak.
Alende ne’e, dezenvolvimentu la la’o maibé iha mós dívida ne'ebé governu halo hamutuk tokon $490 hodi halo estrada parte leste, maibé to’o agora ke’e sai de'it husik hanesan ne’e.
Iha fatin hanesan, Membru CCF, David Dias Ximenes ‘Mandati’, fo orientasaun polítika ba koordenadór Suku Santa Cruz atu la’o tuir hodi konvense simpatizante no eleitór foun sira atu eleisaun vota ba FRETILIN.
Mandati husu ba koordenadór sira atu halo mapamentu polítiku ba área ne'ebé konsidera FRETILIN nia ema sei mínimu atu identifika loloos militante hira mak partidu seluk nian no militante hira mak FRETILIN nian atu nune’e bele hatene loloos.
