Programa prinsipál ne’ebé partidu CNRT hakarak atu kontinua maka Planu Estratéjiku Dezenvolvimentu Nasionál (PEDN) 2011-2030.
Prezidente Bankada CNRT, Arão Noé de Jesus hateten, VII Governu tenke kontinua planu Xanana nian ne’ebé hahú implementa ona hanesan auto-estrada Suai, projetu Suai Suplay Base (SSB) no Liquid Natural Gas (LNG) refinaria iha Betanu-Same no Beaço-Vikeke.
“Ha’u hein Governu ne’e tenke iha kometimentu nafatin para implementa planu ne’e (PEDN). Ida ne’e sai hanesan planu mestre ba dezenvolvimentu 2010 to’o 2030”, dehan nia, iha Uma Fukun PN, horisehik.
Tuir nia, PEDN nu’udar planu nasionál hafoin hetan aprovasaun iha Parlamentu Nasionál, ne’ebé hetan aseitasaun husi partidu politiku sira hotu.
Aarão dehan, bainhira VII Governu maka la ezekuta programa PEDN maka ne’e sei fó impaktu ba diskusaun Orsamentu Jerál Estadu (OJE) 2018 ba oin.
“VII governu haree nafatin ninia programa bazeia ba planu ne’ebé iha ona. Sé fora husi planu ne’e, hanoin susar uitoan. Entaun, governu molok atu halo ezekusaun tenke halo uluk ninia planu ida para substitui planu PEDN ne’ebé governu AMP trasa”, nia apela.
Alende planu hirak ne’e, Aarão mós husu atu governu atu kontinua tau matan nafatin ba implementasaun projetu auto-estrada Dili, Manatutu, Baukau, no Kribas to’o Natarbora-Manatutu ne’ebé hahú implementa ona.
Nia hatutan, planu estratéjiku ne’e planu governu ida nian, planu ne’ebé aprova dezde tinan 2011 ho nia tempu ka ezekusaun ne’e komesa iha tinan 2010 até 2030 ba tinan 20 nian ne’ebé sei mai. Tanba ne’e, hein governu foun sei kontinua hala’o programa PEDN. Sé la kontinua, maka labele konta ho apoiu CNRT nian.
Maski nune’e, kabe mós ba desizaun partidu ninian, hanesan bankada, sira ezekuta de'it polítika partidu nian. Sira la halo polítika ketak, tanba ne’e saída mak sira halo iha PN ne’e reprezenta partidu.
Nia afirma, planu PEDN ne’e hanesan planu ba dezenvolvimentu nasionál kuandu aprova ona iha Parlamentu no sai ona hanesan planu nasionál. Tanba ne’e, husu sé mak eleitu ba iha ne’ebá forma governu tenke haree no halo tuir planu PEDN.
Iha fatin hanesan, Prezidente Bankada FRETILÍN, Francisco Miranda Branco hateten, kona-ba PEDN ne’e VII governu atu kontinua ka la kontinua kompeténsia governu ne’ebé xefia husi Primeiru Ministru, Mari Alkatiri.
“Kona-ba planu ida ne’e kestaun governu nian, ha’u seidauk bele fó komentáriu tanba sei iha hela prosesu nia laran”, tenik nia.
Antes ne’e, Ministru Planeamentu Investimentu Estratéjiku (MPIE), Xanana Gusmão dehan, karik ninia CNRT maka manan sei kontinua implementa projetu boot tolu ne’e.
“Se ami maka manan, ha’u sei kontinua haree nafatin Projetu Suai Supply Base, LNG Betanu no Beaço ho auto-estrada. Komu ami lakon, ita haree took Governu foun mak atu haree oinsá”, dehan Xanana.
Xanana hatutan, mezmu ninia partidu la manan, maibé nia husu ba Ajénsia Dezenvolvimentu Nasionál (ADN) atu kontinua koopera ho governu foin hodi haree implementasaun projetu boot sira ne’ebé governu VI implementa ona.
