Vise-Prezidente II partidu CNRT, Virgílio Smith hateten, delegasaun PERINDO mai atu halo amizade, solidariedade entre partidu polítiku iha nivel nasionál no rejionál. Tanba ne’e, sira mai ko’alia ho organizasaun juventude partidu no klibur profisionál CNRT ninian.

“Estabelese relasoens amizade no kooperasaun entre partidu polítiku iha nivel rejionál”, dehan nia, iha bairru Grillos, horisehik.

Virgílio afirma, klibur profisionál parte husi organizasaun partidu CNRT ne’ebé atu halo analiza ba situasaun hotu-hotu. Tanba ne’e, sira halo analiza ba programa governu no inklui formasaun ba kadernizasaun tuir mai.

Nia informa, sira iha knaar atu tau matan ba juventude hotu-hotu, liuliu juventude partidu CNRT ninian.

Iha fatin hanesan, xefe delegasaun partidu PERINDO, Effendy Syahputra hateten, partidu PERINDO organizasaun polítika foun kompara ho CNRT ne’ebé iha esperiénsia hodi manan eleisaun no forma governu iha 2007 no 2012. Tanba ne’e, hanesan razaun ba PERINDO hakarak atu buka hodi manan esperiénsia hirak ne’e.

“Ami mai atu buka esperiénsia husi sira, tanba ami hanesan partidu foun atu buka esperiénsia hodi iha eleisaun oin mai bele manan hodi kaer ukun. Tanba ne’e, ami mai atu koopera hamutuk ho Organizasaun Juventude Partidu (OJP) CNRT iha futuru,” tenik nia.