“Ita seidauk iha data serteza loloos kona-ba aprezentasaun programa VII Governu nian atu mai fali iha Parlamentu Nasionál”, dehan Presidente Bankada PD, Maria Tereza, iha Uma Fukun PN, Sesta (5/1).

Foin lalais ne’e, kuandu diskusaun no votasaun ba rekursu Orsamentu Ratifika xumba, momentu ne’e kedas Prezidente PN anunsia resesu férias Natál no Tinan Foun. Tanba ne’e, seidauk hetan informasaun foun.

Membru parlamentu Nasionál hotu férias no hala'o hikas atividade iha 8 Janeiru 2018. Tanba ne’e, atu halo ajendamentu ba atividade saida mak atu halo ne’e Prezidente PN sei halo enkontru ho lider bankada mak foin deside.

Deputada ne’e mós seidauk hatene loloos aprezentasaun programa ne’e sei hala’o iha fulan Janeiru ka Fevereiru ne’e nia laran, tanba laiha lei ida limita ba aprezentasaun programa daruak nian husi governu mai iha Parlamentu Nasionál.

Programa daruak nian ne’e sei mai, tanba ne’e obrigasaun husi VII Governu nian atu kumpre hodi halo dezenvolvimentu ba povu no nasaun nia di'ak.

Antes ne’e, iha tinan kotuk, Presidente Konsellu Ministru, Adriano Nascimento fo sai ona iha tempu badak nia laran sei lori programa VII Governu nian mai iha Parlamentu Nasionál.

Tanba governu kuaze atu finaliza ona elaborasaun ba data sira ne'ebé parte opozisaun sira husi kuandu finaliza ona mak sei lori ba PN hodi diskute.

Antes ne’e, Prezidente Bankada PLP, Fidélis Magalhães hatete, governu kuandu kontinua la mai aprezenta sira nia programa ba daruak nian opozisaun mós sei kontinua ezije ba meza PN atu ajenda rekursu kona-ba mosaun sensura nian.

Ne’e hanesan parte ida atu eduka governu hodi kumpre nia devér hodi mai aprezenta sira nia programa ba daruak nian.