Prezidente Bankada CNRT, Arão Noe de Jesus hatete, avaliasaun ne'ebé halo iha semana ikus ne’e, hatudu katak Estadu sei iha osan tokon $200 atu bele jere iha semana rua ne’e nia laran.

Tanba ne’e, orsamentu retifikativu la pasa mós sei la afeta ba kompañia sira, tanba Governu ne’e sei iha osan atu bele selu.

“Osan sei iha tokon $200, tanba ne’e ami hanoin katak osan sei sufisiente para bele finansia Estadu ida ne’e”, dehan nia, iha Uma Fukun PN, horisehik.

Nia hatutan, ba dívida sira ne'ebé Governu anteriór halo seidauk konsege selu, bele uza Orsamentu Jerál Estadu 2018 nian hodi responde.

“Kompromisu sira ne'ebé Estadu halo. Projetu sira ne'ebé seidauk selu ha'u husu ba kompañia sira atu labele preokupa no laran taridu, tanba ne’e bele uza osan 2018 hodi responde”, dehan Arão.

Nia dehan tan, atu selu projetu sira ne’e mós tuir loloos ne’e la'ós osan aprova ba selu diretamente, maibé ne’e tenke tuir progresu projetu nian.

Tanba ne’e, projetu sira ne’e sei sai selu tuir etapa to’o projetu ne’e hetan finalidade. Ne’e duni, sai hanesan ona sistema tenke lori tempu atu bele halo avaliasaun, verifikasaun foin halo pagamentu.

Nune’e, atu responde ba nesesidade povu nian, agora ne’e governu tenke foka ona ba programa governu no Orsamentu Jerál Estadu (OJE) hodi diskute.

Iha fatin hanesan, Deputadu Manuel Carvalho hatete, krize polítika ne'ebé agora akontese iha rai laran afeta tebes ba emprezáriu nasionál sira, tanba sira balun difisil ona atu selu traballadór.

Nia hatutan, kompañia nasionál sira balun ezekuta projetu atinje ona 50% to’o 90%, maibé governu seidauk bele halo pagamentu tanba ho razaun osan laiha.

Tuir loloos, Parlamentu Nasionál tenke aprova orsamentu retifikativu atu halo pagamentu ba projetu ne'ebé implementa ona, maibé ne’e la akontese sei afeta tebes ba emprezáriu nasionál sira nia destinu iha vida negósiu.

Emprezáriu timoroan sira ne'ebé kaer projetu sira ne’e maioria la halo kréditu iha banku, tanba rekizitu barak tebes. Tanba ne’e, balun tenke foti ema nia osan hodi implementa projetu ho funan ne'ebá boot.

Tanba ne’e, kuandu governu halo pagamentu tarde mak osan funan mós aumenta beibeik.

Ne’e duni, nia husu ba Governu atu bele buka meius oinsá bele halo ona pagamentu lalais ba projetu sira ne'ebé iha ona progresu. Nune’e bele ajuda liután emprezáriu sira-nia ezisténsia hodi hasa’e kresimentu ekonomia liu husi loke kampu servisu ba timoroan sira.