Tuir bloku ne’e, dalan loloos ne’ebé Governu atu aprezenta ninia programa maka iha Uma Fukun Parlamentu Nasionál hodi bele hetan aprovasaun husi deputadu sira, la’ós lori fali ba povu sira iha baze.
Hafoin opozisaun sira halo rejeisaun ba programa VII Governu, Primeiru Ministru Mari Alkatiri deklara sei lori programa governu hodi aprezenta direita ba povu tomak hahú husi Oekusi.
Foin lalais ne’e, Xefe Governu ho ekipa lori programa hodi esklarese ba povu Munisípiu Ermera atu bele hatene loloos konteúdu programa ne'ebé elabora husi partidu FRETILIN no PD, maibé la konsege pasa iha PN.
Haree ba polítika ne’e, Prezidente Bankada PLP, Fidelis Magalhães hatete, antes ne’e primeiru ministru rasik deklara atu halo referendu, maibé to’o agora seidauk akontese.
Atividade PM nian ne'ebé lori programa governu ba sosializa iha baze ne’e halo bloku AMP sente ‘laran makili’ tanba la loos. Atu aprezenta programa governu nian ne’e iha parlamentu nasionál la'ós iha baze.
“Atividade ne’e somente ba halo kampaña de’it”, dehan Fidelis, iha Uma Fukun PN, horisehik.
Nia esplika, tuir Konstituisaun, programa governu nian ne’e lori mai iha PN hetan apresiasaun foin bele lori ba baze hodi halo sosializasaun.
Governu ne’e atu kompleta ona fulan neen, maibé laiha programa ne’e difisil hanesan reprezentante povu atu halo fiskalizasaun iha baze, tanba laiha baze ida atu deputadu sira kaer hodi ba halo fiskalizasaun.
Iha fatin hanesan, Deputadu Natalino da Costa hateten, fatin ka dalan atu aprezenta programa Governu nian hodi hetan apresiasaun husi deputadu sira mak Parlamentu Nasionál.
Tanba ne’e, PM lori fali programa governu ba sosializa iha baze ne’e la tuir ona Konstituisaun, tanba sira koko halo fali estra parlamentu nasionál. Tanba ne’e, viola ona konstituisaun.
Deputadu ne’e esklarese, karik atividade ne’e halo referendu seidauk iha lei ba. Atu halo referendu mós deputadu 1/5 (um quinto) mak husu ba Prezidente Repúblika konvoka no lori fali mai iha PN mós deputadu 2/3 ka deputadu 43 aprova mak foin ba halo referendu.
“Ita seidauk iha lei referendu, atu halo tan referendu ba programa ne’e la masuk akal”, dehan Natalino.
Tanba ne’e, atu ko’alia kona-ba sentidu estadu tenke la’o tuir duni konstituisaun la'ós kontinua halo buat ne'ebé fora husi konstituisaun.
