“Ha’u husu de’it ba Primeiru Ministru atu tetu didi’ak ninia proposta nomeasaun ba membru governu. Ha’u halo ida ne’e, nu’udar Prezidente Repúblika”, dehan nia, iha serimónia pose ne’e.

Nia dehan, Xefe Estadu iha devér atu kontribui ba governasaun di’ak no ba Estadu nia naran di’ak. Xefe Estadu mós ne’e atu hataan ba ezijénsia sira ne’ebé mai husi sosiedade sivíl ne’ebé boot ba beibeik katak membru governu tenke ema sériu, la hasoru alegasaun ka akuzasaun.

PR Lú-Olo hateten, maioria povu la hatene konseitu jurídiku sira, hanesan, prezunsaun inosénsia no sentensa tranzitada-em-julgadu maibé ema hatene rekoñese ona sinál sira ne’ebé hatudu korrupsaun.

Povu sente ona katak korrupsaun mosu ona iha país tomak. Mensajen sosiedade sivíl nian la ko’alia hasoru rezultadu eleisaun antesipada, maibé fó hatene deskonfiansa, katak sira la fiar maluk balun ne’ebé tama iha lista proposta ba Governu husi Primeiru Ministru.

“Ha’u nu’udar Prezidente Repúblika iha devér atu haree oinsa atu povu labele lakon konfiansa iha ita nia ukun na’in no instituisaun sira. Tuir ha’u nia haree, deskonfiansa ne’e la mosu se ita uza métodu transparente no prevensaun bainhira halo nomeasaun”, dehan PR Lú-Olo.

Entretantu membru governu ne’ebé la hasoru satan legál ne’ebé de’it bainhira simu pose mak bele hala’o sira nia kna’ar ba beibeik durante mandatu tinan lima. Situasaun ne’e la’ós fó de’it dalan ba governu tomak ukun tinan lima tuituir malu, maibé loke dalan mós ba halo ema fó fiar ba VIII Governu.

Ne'e duni, Xefe Estadu fiar katak Primeiru-Ministru sei halo buat hothotu atu hatama ba Governu maluk sira ne’ebé kredivel, efisiente no efetivu, ne’ebé bele garante governasaun transparente no ho susesu iha tinan lima mai.