DILI: Prezidente Repúblika, José Ramos-Horta, kinta foin lalais (26/01), partisipa selebrasaun loron nasional Australia ba dala-235 iha Timor Plaza Díli. Nune’e, Xefe Estadu, konsidera Austrália nu’udar nasaun viziñu no estratéjiku ba Timor-Leste dezde funu mundiál daruak, hanesan mós Indonézia.
“Austrália ita nia viziñu ne’ebé importante tebes, rai-riku no iha poténsia ekonómika, militár no demokrasia. Timor-oan rihun ba rihun iha Austrália ne’ebé hetan ona nasionalidade. Tinan 20 ona halo kooperasaun oin-oin iha setór Polísia, Militár, Edukasaun, Saúde, Agrikultura no dezenvolvimentu rural no ida importante liu mak Timor-oan ba servisu iha Austrália,’’dehan Xefe estadu, iha komunikadu ne’ebé Online INDEPENDENTE sita.
Prezidente Repúblika relembra katak, iha 1999, Austrália mak lidera misaun INTERFET, hodi halo prevensaun ba aktu violentu, hafoin loron referendu.
Iha fatin hanesan, Enkarregadu Negósiu Austrália mai Timor-Leste, John Feaks mós destaka relasaun forte entre nasaun rua.
“Relasaun ho Timor-Leste, bazea ba indikasaun sira hotu importante tebes no valorizadu tebes mai ami. Ita nia relasaun forte liu husi geografia, maibé barak liu fali ida ne’e. Relasaun ne’e hariku husi valór sira ne’ebé ita partilla, fó respeitu ba ema ida nia direitu, fiar, fó respeitu ba ema ida-idak nia perspetiva no fó komprimissu ba prosesu demokrasia” tenik John Feaks.
Diplomata ne’e mos rekoñese sakrifísiu husi timor-oan sira durante funu mundiál daruak, hodi ajuda forsa australianu no konsidera hanesan tusan ida Austrália.
Entretantu, loron nasional Austrália hahu selebra iha tinan 1788, hodi reflete, relembra no selebra atrakamentu armada ró ho naran First Fleet to’o iha portu Jackson.
