Objetivu husi programa ida ne’e mak atu hadia saúde no nutrisaun ba inan isin rua no labarik sira, redús pobreza no hasa’e ekonómia família sira nian.

Tuir Diretór Jeral Administrasaun no Finansas, Rui Manuel Gagu Expostu, hatete, asinatura akordu ida ne'e hodi bele mellora liútan pagamentu transferensia osan ba benefisiariu programa Bolsa da Mãe-Jerasaun Foun iha munisipiu Kovalima, Líkisa, Manatuto no Vikeke.

Ne’ebé benefisiáriu inan isin-rua sei simu dolar amerikanu $15 kada fulan, labarik tinan 3 mai kraik $20 kada fulan no suplementu adisional $10 ba labarik ho moras krónika ka defisiensia.

“ Ohin MSSI halo koperasaun ho Telemor objetivu atu halo pagamentu elektronik ba benifisiariu BdF-JF liu husi Mosan ba Munisipiu haat iha tinan ida ne'e, Hein katak iha implementasaun transferensia osan ba benefisiárius BDM-JF bele la’o ho di’ak iha Munisípiu Kovalima, Manatuto, Vikeke no Líkisa. Ami fiar katak mosan sei bele presta ninia servisu ho di’ak,” dehan nia iha Edifisu MSSI, Kaikoli, segunda ne’e (30/01).

Nia dehan, to'o ohin loron, total aplikante ne'ebé rejista ona ba programa Bolsa da Mãe-Jerasaun Foun iha Munisiplu Ainaro, Bobonaro no RAEOA hamutuk 15.120.

Aplikasaun hirak ne'ebé tama, sei liu prosesu verifikasaun antes simu pagamentu hafoin hetan aprovasaun.

Nia hatutan, iha tempu badak MSSI sei haluan rejistrasaun ba programa Bolsa da Mãe-Jerasaun Foun iha Kovalima, Líkisa, Manatuto no Vikeke.

Benefisiariu hirak ne'ebé hetan ona aprovasaun sei hahú hetan pagamentu liu husi ajensia pagamentu BNCTL no karteira eletrónika (TPAY no MOSAN) iha ida-idak nia munisipiu.

Aleinde subsidiu osan kada fulan, programa Bolsa da Mãe - Jerasaun Foun mós fornese akonsellamentu kona-ba saúde husi pesoál saúde sira inklui ba kuidadu saúde durante peródu isin-rua, periódu primeira infansia inklui imunizasaun, nesesidade hahán nutritivu ba familia no prátika jeniku no sanitazasaun.

Iha fatin hanesan, Vise-Jestór Telemor Fintech, Protasio Bacun hateten, iha prosesu pagamentu sira sei uza sistema mosan, hodi halo halo transferénsia osan ba benefisiáriu sira iha Munisípiu.

“Prosesu ida ne’e ami sei rejista benefisiáriu sira iha sistema mosan no ami sei halo transferénsia osan diretamente ba benefisiáriu sira nia konta mosan, informasaun hotu benefisiáriu sei assesu deit liu husi sira nia telefone. Durasaun akordu refere tinan ida,”nia dehan.

Entretantu, Bolsa da Mãe-Jerasaun Foun mak programa transferensia osan ne'ebé estabelese ho Dekretu Lei númeru 22/2021 loron 10 Novembru.

Enkuantu, programa ne'e hahú ona iha Ainaro, Bobonaro, no RAEOA, iha tinan 2022

“Iha tinan ne’e sei haluan ba iha Munisipiu Kovalima, Líkisa, Manatuto no Vikeke, no mós sei haluan neneik ba teritoriu laran tomak”.