Tuir Jeneral Reformadu Lere Anan Timor, hatete, Marsa ba Paz ida ne'e, hatudu liliu ba juventude no matenek intelektual sira katak, hakmatek no paz mak bele dezenvolve rai ida ne’e.

"Ha'u nu'udar antigus alunus salesianu, salesianu sira hanorin ema la'os atu sai matenek de'it, maibé hanorin atu hatene mós servi nia povu no nia rain,”dehan nia iha Jardin Na’in Feto, Bidau-Lesidere, sabado ne’e (28/01).

Ho nune’e, nia husu ba joven sira, liliu joven arte marsial no arte ritual sira atu kria paz tuir Dom Bosco nia hanorin.

Tuir Lere, joven arte marsial no arte ritual la’ós buat aat, maibé tenki aproveita ho di'ak no konsidera ida ne’e sai hanesan desportu ida iha rai laran, atu nune’e aban bairua lori nasaun nia naran diak ba rai liur.

iha sorin ketak, Seketeriu Jeral Antigus Alunus Asosiasaun Dom Bosko Dili, Armando da Costa hatete, sarani sira halo atividade Marsa ba Paz husi Dom Bosco Komoro to'o jardin Na’in Feto Bidau Lesidere hanesan akividade ida ne'ebé atu selebra tinan Dom Bosco nian.

Ho objetivu atu promove mensajem pas husi Amu Papa no Dom Bosco ba jovem sira iha Timor-Leste liuliu iha Kapitál Dili.

Nia informa, Atu komemora festa Dom Bosko ba dala 135, sei realiza atividade desportu hanesan Futeboll, Basketball, Limpeza Jeral no haksolok hamutuk iha Night Market iha Timor Plaza.

No ikus sei taka ho Misa Dom Bosco nian, iha loron 31 Janeiru, iha Parokia Maria Auxiliadora Komoro ne'ebé prejidi husi Reprejentate Amu Papa iha Timor-Leste Monsiñor Marcos Fissy.

Enkuantu, atividade Marsa ba Paz partisipa husi Antigus Alunus Salesianu, Amu lulik sira, madre, Movimentu Juvenil Salisianu,  Estudante no Profesores husi eskola São Pedro, São Miguel Arcanjo no Cristal.

Aleinde, partisipa mós husi Lider Kárismatiku José Alexandre Kay Rala Xanana Gusmão ho Tanente Jeneral Reformado Lere Anan Timor.