Nune’e, iha tempu badak sei haruka traballadór hirak ne’e ba servisu iha Korea Súl.

Enkuantu, traballadór hirak ne’e kompostu husi mane na’in 62 sei servisu iha área peskas no feto na’in ida sei servisu iha área fabrika.

Diretor Nasional Exterior Empregu, Filomeno Soares, hatete, tuir planu traballadór hirak ne’e sei aranka iha loron 29 fulan-Janeiru tinan ne’e.

Ho nune’e, nia husu ba traballadór sira labele haluha katak sira mak sai fonte ba nasaun Timor-Leste nia pasado no futuru.

“Imi ba Korea, tanba esforsu no sakrifisiu ne’ebé imi nia maun sira halo ona iha pasadu, tan ne’e imi nia komportamentu no servisu diak sei oferese imajen diak ba ema Korea. Iha future, alin barak mak sei ba Korea bainhira imi hatudu imi nia komportamentu no servisu diak iha ne’ebá,”dehan nia liu husi diskursu, iha Salaun Ótel Timor Lodge, Komoro, sesta ne’e (27/01).

Nia hatutan, traballadór sira ne'e sei reprezenta Timor-Leste iha Korea, nunee labele haluha katak povu Korea sei koñese no defini Timor-Leste liu husi hahalok diak sira ne'ebé iha.

Ho nune’e, Diretór ne’e husu ba traballadór sira, bainhira la hatene lei laboral iha Korea Súl, bele konsulta patraun ka ema ne'ebé hatene. Atu nune’e labele mosu problema ruma iha ne’ebá.

Entretantu, iha fatin hanesan, reprezentante traballadór Timoroan husi Munisipiu Ainaro, Bazilio Monteiro hateten, antes ba servisu iha Korea ba dahuluk tenki kursu hodi hatene uluk sira nia lian.

La’ós lian deit, maibé estuda mós etika no aprende mós kona ba oinsa dezenvolve ekonomia Korea nian lao ba oin.

"Hau nia mensajen ba joven sira, keta lakon oportunidade no aproveita oportunidade atu bele atinji ita nia mehi hodi sai realidade”.