Xefe Governu konsidera inisiativa ne’e importante no istóriku tebes hodi moderniza infraestruturas iha Ospitál Nasionál Guido Valadares Dili, atu bele fó konfortável ba pesoál saúde no mós pasiente sira, tanba kuaze tinan naruk, HNGV iha kondisaun ladún favorável.
“Inisiativa ida ne’e, inisiativa ida importante, no istóriku tebes, inisiativa ne’e enkuadra husi Ministériu Saúde nian, iha sira nia vizaun ba aban bainrua nian, vizaun ida ne’e integra iha esforsu prepara Master Plan Ospitál Nasionál Guido Valadares no Ospitál Lahane, entaun pasu ida ne’e pasu fundamental tebes atu fó pontabeleseu ida, nia esforsu atu moderniza ita-nia infraestruturas saúde”, dehan Xefe Governu, ne’ebé Online INDEPENDENTE sita iha komunikadu.
Tan ne’e, Xefe Ezekutivu apresia ho esforsu husi Ministériu Saúde no parte envolvidu sira ba esforsu halo alterasaun ba dezeñu anterior hodi ikus mai bele realiza.
“Kuandu ha’u tama Primeiru-Ministru, ha’u haree dezeñu anteriór ladún di’ak, ha’u husu para halo alterasoins, ha’u hanoin alterasoins ida ne’e, bele lori tempu naruk loos, probabilidade boot liu mak ita labele realiza iha tempu ida ne’e, mas felizmente ho apoiu hotu-hotu liu-liu Ministériu Saúde nian, Profisionais Ministériu Saúde nian ita konsege, ha’u hakarak parabeniza tékniku no profisionais sira hotu ne’ebé lakon tempu, lakon enerjia para ké halo projetu ida ne’e, bele lansa ohin,” tenik Xefe Governu.
Lider VIII Governu ne’e afirma, tempu ona atu investe iha saúde hodi bele atende pasiente sira ho dignidade tanba dala barak akontese iha sala VIP kuandu membru Governu ruma moras fatin laiha tenke hasai komunidade baibain, ne’e hanesan soké ida.
“Ita hotu nia mehi ida de’it, ha’u hanoin tempu to’o ona, para ké ita investe iha ita-nia saúde,”tenik Xefe Governu.
Tan ne’e, Xefe Governu apela ba Kompañia Konstrutora atu kumpri tempu no kualidade.
Entretantu, Edifísiu Pediátriku no Kuidadu Intensivu HNGV ho andar Lima ne’e, sei kaer hosi Kompañia Internasionál Xinéza, China Civil Engenering Construction Coorporation ho durasaun tinan 2. Projetu ne’e mós sei hetan fiskalizasaun hosi Kompañia Konsultan hosi Indonézia, PT. Bennatin Surya Cipta Indonesia ho nia joint venture Rachio Plan Counsultant LDA.
Enkuantu, partisipa iha lansamentu ne'e Vise Primeiru-Ministru, José Maria dos Reis, Ministra Saúde, Odete Maria Freitas Belo, Vise-Ministru Saúde, Bonifácio Mau Coli dos Reis no Sekretáriu Estadu Terras no Propriedades, Eldino Rodrigues dos Santos, reprezentante Embaixada Xina no Kompañia Konstrutora.
