Duratne enkontru, parte rua ko’ali kon-ba parseira naruk entre Timor-Leste no UNFPA, hodi subliña prioridade sira husi programa nasaun nian ne'ebé la'o hela no planu estratéjiku sira ba kooperasaun iha futuru hodi apoiu dezenvolve nasaun nian.

“Prinsipál tema ne’ebé diskute maka kompromisu hamutuk hodi hamenus mortalidade materna iha Timor-Leste. Dr. Bodiroza elojia ba kolaborasaun ne'ebé la'o hela ho Ministériu Saúde no hatudu konfiansa katak nasaun ne'e iha dalan ne'ebé loos hodi hamenus taxa  mortalidade ne’ebé signifikativu,” Sita komunikadu ne’ebé INDEPENDENTE asesu husi Media PR, Sexta (29/05).

Tuir dadus foin lalais ne’ebé disponível, iha tinan 2016 Timor-Leste rejista mate hamutuk 195  husi kada moris-moris na'in 100,000. Hein katak númeru foun sei hatudu dezenvolvimentu pozitivu no progresu sira importante iha área ida ne’e.

Reuniaun ne’e mós destaka kona-ba importánsia husi dadus populasun ba planeamentu polítika públika. Iha kontestu ne’e, sita susesu husi Sensus Nasionál 2022 no mós Estudu Saúde Demográfika (DHS) foin lalais ne'e.

Rezultadu prelimináriu sira husi DHS nian sei fó sai iha fulan-juñu 2026, enkuantu relatóriu finál prevee atu fó sai iha fulan-outubru tinan ida ne’e. Dadus foun ne'e sei sai nu'udar instrumentu fundamentál ba Governu hodi hadi'a polítika saúde ne’ebé efikáz liu  no hadi’a servisu di'ak liután ba feto no labarik sira iha rai-laran.