Hahú hosi Prezidente nia diálogu diplomátiku estratéjiku ho ofisiál Japaun sira, vizaun ne’ebé uluk simples de’it ba manutensaun ró lokál, agora dezenvolve an sai sentru boot internasionál ba konstrusaun ró nian.
“Hodi hahi kompañia Japaun ne’ebé koñesidu iha mundu ba sira-nia investimentu transformadór ne’e,” Dehan PR Horta, liu husi komunikadu ne’ebé online INDEPENDENTE asesu, Kinta (11/06)
Xefe Estadu promete atu atua nu’udar embaixadór globál ba estaleiru ne’e, hodi kompromete atu promove rasik ró sira ne’ebé halo iha Timor ba kompradór internasionál sira iha Médiu Oriente, Áfrika no Amérika Latina durante ninia misaun diplomátika sira tuirmai.
Aliende ne’e, Xefe Estadu destaka nesesidade urjente atu mantein investimentu estranjeiru ne’ebé monumentál tebes ne’e, Prezidente fó orientasaun maka’as ba governu atu elimina obstákulu burokrátiku sira no aselera reforma ekonómika.
Prezidente Ramos-Horta husu maka’as ba Ministériu Finansas no instituisaun Estadu relevante sira atu implementa lalais insentivu fiskál ba tinan 10 to’o 15 no finaliza infraestrutura apoiu sira ne’ebé kruziál, liuliu projetu enerjia solar Laleia nian.
Prezidente Ramos-Horta subliña katak fornese enerjia renovável ho folin baratu no estabelese polítika ekonómika ne’ebé kompetitiva mak importante tebes atu garante viabilidade komersiál estaleiru nian no asegura rihun ba rihun empregu ho kualidade aas ba povu timoroan.
Ko’alia ba sidadaun foin-sa’e sira ne’ebé prepara an ba formasaun avansadu iha Japaun, Prezidente Ramos-Horta fó-hanoin ba sira katak sira-nia dixiplina, servisu maka’as, no respeitu ba rai ospedeiru nia kultura sei halo sira sai embaixadór di’ak (goodwill ambassadors) ne’ebé vitál ba nasaun. Xefe Estadu destaka kbiit ekonómiku maka’as hosi timoroan sira ne’ebé servisu iha rai-li’ur, hodi nota katak sira-nia remesa (osan ne’ebé haruka mai) ho totál liu millaun $200 iha tinan kotuk, fornese liña-moris ne’ebé direita no efetivu liu ba família lokál sira duké ajuda internasionál tradisionál sira.
Prezidente reafirma ninia kompromisu ne’ebé inabalável (firme) atu haluan parseria laborál no industriál internasionál sira-ne’e, hodi haree ida-ne’e nu’udar fatuk-inan ba reziliénsia no prosperidade ekonómika Timor-Leste nian iha futuru.
