Nia dehan, bainhira fila husi Roma, sei ba fali Jakarta atu hasoru Ministru Koordenadór Luhut, Ministru Mafud MD ho tan Ministru Retno, tanba ne'e mak ohin hamutuk ho Xefe Estadu ko'alia klean kona-ba fronteira ho Indonézia.
"Iha Jakarta hahú ona ko'alia ho Prezidente Indonézia Jokowi Dodo, atu bainhira loos no oin nusa mak bele hahú prosesu kontinuasaun, diskusaun kona-ba fronteira. Tanba iha fronteira rua hanesan fronteira terrestre iha Oekussi nian, no ida seluk mak fronteira tasi nian, tanba ne'e sei fó tempu tomak atu ko'alia kona-ba ida ne'e," dehan Xefe Negosiadór Prinsipál Delimitasaun Fronteira Terrestre, Xanana Gusmão hafoin simu brifing husi Xefe Estadu iha Palasiu Prezidensiál Bairu-Pite foin lalais.
Xanana hateten, ida seluk mak hanesan imi hatene foin dadaun Xefe Estadu vizita Indonézia, no ko'alia asuntu barak, tanba ne'e ohin mós ko'alia asuntu ida ne'e, no husu atu haree fila fali fronteira terrestre no maritima ho Indonézia.
Tanba, Covid-19 kuaze tinan rua ho balun atu tama tinan tolu, la ko'alia kona-ba fronteira, no laiha kontinuasaun ba asuntu ida ne'e, tanba ida ne'e mak depois Xefe Estadu fila husi Indonézia fó hatene mai ami, no halo ona kontaktu ho parte Indonézia atu haree fila fali fronteira.
Molok ne'e, Prezidente Repúblika José Ramos Horta hateten iha fulan Agostu 2022, Xefe Negosiadór Prinsipál Delimitasaun Fronteira Terrestre, Xanana Gusmão, sei dezloka ba Indonézia hodi kontinua halo diskusaun ba negosiasaun prosesu fronteira terrestre ka rai maran entre Timor Leste no Indonézia ne'ebé disputa hela.
Asuntu fronteira terrestre sai mós asuntu importante durante vizita Xefe Estadu hasoru malu ho nia omólogu Prezidente Repúblika Indonézia Joko Widodo oinsá nasaun rua ne'e bele tuur hamutuk atu aselera prosesu ne'e ba oin.
Iha fulan Agostu Xefe Negosiasaun Fronteira Terreste Xanana Gusmão sei hakat ba Indonézia, lahatene iha loron saida, maibé sei akontense hodi haree bele avansa ona ho akordu fronteira terrestre," hateten PR Horta.
Xefe Estadu ne'e hateten kona-ba fronteira terrestre uluk antes pandemia COVID-19 ne'e, sira hetan tiha ona akordu prelimináriu ida, maibé depois ho situasaun COVID-19 ho mós mundansa iha Indonézia tanba asidente boot akontese ho ministru Wiranto, maibé muda ministru entaun buat sira ne'e demora.
Maibé, tuir Ramos Horta informasaun ne'ebé hetan durante iha Jakarta mak iha fulan Agostu mai ne'e Xefe Negosiasaun Fronteira Terrestre Xanana Gusmão ho ekipa sei ba iha Jakarta hodi diskute kona- ba prosesu refere.
