Xanana dehan, Prezidente Repúblika nomeia nia atu reprezentate Estadu TL iha Vatikanu, bainhira Don Virgílio simu posse ba Kardiál.

Nia hateten, atu ba Roma, Xefe Estadu agradese ba Papa Francisco, tanba konsidera Timor Leste nia Arsebispu ida atu sai mós Kardiál no ida ne'e atu foti mós Timor nia naran no imajen iha mundu.

"Iha Roma enkontru ho Amu Papa, tanba ne'e ha'u la ba ho ha'u nia naran rasik, maibé hanesan reprezentate Xefe Estadu no estadu Timor Leste. Iha Roma sei ko'alia kona-ba dokumentu fraternidade umana, tanba dokumentu ne'e, buat ida boot tebe-tebes," dehan Xanana, iha Palasiu Prezidensiál Bairru-Pite, foin lalais.

Tanba, fraternidade umana ko'alia kona-ba unidade nasionál no rekonsiliasaun no iha Timor Leste rasik.

"Ita hahú ona konsolidasaun ba fraternidade umana ne'ebé akomula relejiaun sira iha Timor Leste hanesan Katóliku, protestante, Islámiku, Budista no Konghucu, atu hatudu nafatin katak iha Timor bele iha probelma entre arte marsiál, maibé unidade entre relijiaun metin nafatin," hateten nia.

Tanba, dala ruma hakarak hala'o buat ida boot tebe-tebes, maibé tenke hahú ho nei-neik, no importante liu atu tinan-tinan, Timor Leste tenke iha atividade hodi konsolida fraternidade umana, atu fraternidade umana sai di'ak liu tan.

Nia esplika, Vise Prezidente Vatikanu nian sei mai Timor, no dala ruma sei hasoru Xefe Estadu hodi ko'alia kona-ba dokumentu fraternidade umana hodi hametin unidade no fraternidade.

Entretantu iha enkontru ne'e, Prezidente Repúblika José Ramos Horta mós fó hatene ba Líder Karizmátiku Kay Rala Xanana Gusmão, atu aprejenta ba Amu Papa katak iha Timor Leste laiha problema entre relijiaun no Timor Leste hahú promove no konsolida fraternidade umana.