Iha tinan ida ne’e, mosu esperansa boot ida hafoin Prezidente Repúblika, José Ramos Horta, hatudu nia laran luak hodi fó apoiu ba Lidia dos Santos atu hala’o tratamentu saúde iha Siloam Hospital Semanggi, Jakarta, Indonezia.
Ho apoiu husi PR Horta, iha 19 Agostu ne’e, oan feto husi Julião dos Santos Gonçalves no Delfina dos Santos ne’e, aranka ba Jakarta hodi hala’o tratamentu saúde.
“Tinan rua resin ona nia moras kankru tulang (ruin), kona husi ain, ne’ebé infeksaun husi laran ne’e mak sai bubu boot,” dehan Lidia nia aman, Julião dos Santos Gonçalves, iha Aeroportu Nicolau Lobato Komoro, molok aranka ba Indonezia.
Julião ne’ebé durante ne’e ho nia familia hela iha suku Lauhata, Postu Administrativu Bazartete, Munisípiu Likisa, konta, nia oan feto ne’e hahú sente moras iha nia ain karuk iha tinan 2020, bainhira nia tama iha klase 4.
Maske sente moras maibé estudante husi Ensinu Primaria Katolika Aipelu ne’e kontinua esforsu an hodi ba eskola. Maibé bainhira tama iha ezame periodu daruak nian, Lidia nia ain komesa bubu no nia tenke para eskola.
Ho moras ne’ebé Lidia sente, familia lori Lidia ba Hospital Nasionál Guido Valadares hodi halo tratamentu no ikus mai parte ospital informa ba familia katak Lidia sofre kankru ruin.
Entretantu, iha tinan ida ne’e, ekipa Prezidente Repúblika konsege deteta kondisaun husi Lidia no Gabinete Sosiadade Sivil palasiu prezidensial hala’o vizita ba Lidia nia hela fatin hodi haree direitamente kondisaun husi labarik ne’e.
Hafoin ida ne’e, PR Horta deside hodi fó apoiu ba Lidia hodi bele kontinua hala’o tratamentu saúde iha Jakarta, Indonezia.
Koñese Kankru Ruin
Atu koñese kankru ruin ne’ebé Lidia sofre, tuir mai Jornal INDEPENDENTE oferese informasaun kona-ba kankru ruin ne’ebé sita husi aladokter.com;
Kankru ruin nu’udar tipu kankru ne’ebé mosu iha selula iha ruin laran. Kankru ruin ne’e bele ataka ruin ne’ebé de’it iha isin, maibé jeralmente mosu iha ruin kanotak, ain no liman.
Kankru ruin nu’udar kondisaun ne’ebé akontese raru ka la sempre (jarang), iha de’it 1% husi pasiente kankru hotu-hotu. Kondisaun ida ne’e bele mosu ba kualke grupu idade, maibé dala-barak mosu ba labarik, joven, no foin-sa’e.
Tumor ne’ebé forma iha ruin ne’e barak liu mak maus duke buas (ganas). Maibé, se dezenvolve, selula kankru bele harahun ruin ne’ebé rezulta ruin sai lahok no fasil atu tohar.
Tipu Kankru Ruin
Kankru ruin fahe ba tipu balun hanesan:
- Osteosarcoma
Osterosarcoma nu’udar tipu kankru ruin ne’ebé dala-barak akontese. Kankru ruin ne’e dezenvolve iha selula ruin liman, ain no kanotak.
Osteosarcoma dala-barak kona ema ho idade tinan 10–30 no barak liu kona mane duke feto.
- Chondrosarcoma
Tipu kankru ruin ne’e dezenvolve iha selula ruin vulneravel iha area liman parte leten, kabas, knosen (rusuk), kanotak no kelen. Chondrosarcoma dala-barak kona feto ho idade liu tinan 40.
- Sarkoma Ewing
Tipu kankru ruin ne’e jeralmente dezenvolve iha ruin kanotak, kelen, no lulur-ruin (tulang kering). Sarkoma Ewing dala-barak kona ema ho idade tinan 10–20. 10% de’it husi kazu Sarkoma Ewing ne’ebé kona adultu ho idade tinan 20 ba leten.
- Chordoma
Tipu kankru raru ne’e jeralmente mosu iha baze husu ulun nia ruin ka iha baze ruin iha kotuk laran, no iha tendensia dezenvolve neneik. Chordoma dala-barak kona mane ho idade tinan 30 ba leten.
- Fibrosarcoma
Fibrosarcoma nu’udar tipu kankru ne’ebé dala-barak dezenvolve iha parte ne’ebé mamar duke ruin. Maibé, dala-ruma tipu kankru ne’e bele mosu iha ruin liman, ain ka hasarahun-ruin (rahang). Fibrosarcoma jeralmente hetan iha ema adultu ho idade tinan 40 ba leten.
- Giant cell tumor
Maioria giant cell tumor ho karater maus, maibé la agresivu. Tipu kankru ruin ne’e jeralmente ataka ruin iha liman no ruin besik ain-tuur. Tumor ne’e la sempre ataka parte isin seluk ne’ebé dook, maibé dala-barak mosu fila fali maske hasai ona.
