Molok ne’e, partidu CNRT ofisialmente deklara dada an husi governu konstitusional daualu ne’ebé sira forma hamutuk ho Partidu Libertasaun Popular (PLP) no partidu Kmanek Haburas Unidade Nasional Timor Oan (KHUNTO).
Maske deklara retira maibé, seidauk iha desizaun no orientasaun ofisial ba membru CNRT ne’ebé sai membru governu atu sai ka mantein.
Ho nune’e, iha Sabadu (23/05), liu husi konferensia imprensa iha Sede CNRT, Bairo dos Grilhos, Prezidente CNRT, Kay Rala Xanana Gusmão hatuun direitamente orientasaun ba kuadrus CNRT iha governu atu rezigna an.
“Segunda-feira (ohin) mai ne’e membru CNRT ne’e indika toma parte oitavo Governu ne’e sira sai hotu ka rezigna an,” dehan Xanana.
Desizaun ida ne’e, Xanana dehan, bazeia desizaun ne’ebé foti iha reuniaun ne’ebé hala’o iha 25 Maiu, entre Konsellu Politika Nasional CNRT, deputadu bankada CNRT, no membru governu CNRT no reprezentante CNRT husi munisipiu sira.
Entretantu, membru partidu CNRT ne’ebé envolve iha governu daualu mak hanesan: Ministru Estadu Prezidensia Konsellu Ministru, Hermenegildo Augusto Cabral Pereira; Ministru Negosiu Estrajeiru no Kooperasaun, Dionisio da Costa Babo Soares; Ministra Edukasaun, Ensinu Baziku, Juventude no Desportu, Dulce de Jesus Soares; Vise Ministra Finansas, Sara Lobo Brites; Vise Ministru Administrasaun Estatal, Abilio José Caetano; Sekretariu Estadu Kooperativa, Arsénio Pereira da Silva; Sekretariu Estadu Juventude no Desportu, Nelio Isaac Sarmento; no Sekretariu Estadu Arte no Kultura, Teofilo Caldas.
Molok ne’e, Primeiru Ministru Taur Matan Ruak deklara, nu’udar Xefe Governu nia laiha intensaun atu hasai membru governu sira husi partidu CNRT, maibé iha balun ne’ebé mak tenke book duni.
PM Taur dehan, membru governu husi partidu CNRT sei hala’o hela sira-nia knar, maibé la signifika sira-nia pozisaun garantidu.
“Intensaun atu hasai membru governu CNRT nian, emprinsipiu lae, mais iha balun tenke book. Iha pose (ba membru governu foun) mak ita-boot sira sei haree see mak sai, see mak hela, atu servisu oinsa, informasaun ba publiku ne'e sei iha," dehan PM Taur hafoin enkontru semanal ho Prezidente Republika Francisco Guterres Lu Olo iha Palasiu Prezidensial Aitarak Laran, Kinta (21/05).
Hatan kona-ba data fiksu tomada pose ba membru governu foun, PM Taur hatan, kalendariu pose ba membru governu ne’e prezidente mak monta, governu preparadu kualker tempu.
