Husi Kandidatu na'in lima ne'e, pesoál Kay Rala Xanana Gusmão fó apoiu liu ba ema ne'ebé nia-haree hanesan nia alin.  

Xanana ninian alin ne'e mak Francisco Guterres 'Lu-Olo', kandidatu Prezidente Repúblika husi Partidu FRETILIN. 

“Hanesan pesoál ha’u iha alin ida. Ne’e hanesan pesoál ha’u fó apoiu ba Sr. Doutór Lu-Olo," dehan Xanana Gusmão, iha Aeroportu Komoro, horisehik. 

Maski nune'e, pozisaun Partidu CNRT ninian laiha figura ruma atu kandidata ba Prezidente Repúblika. 

Kona-ba apoiu ba kandidatu ruma partidu seidauk iha desizaun fiksu, tanba tenke foti liu husi kongresu nasionál. 

"(Desizaun) partidu seidauk. Tanba ami servisu hela ne'e mak adia hela kongresu," tenik nia. 

Kona-ba informasaun hasoru malu ho eis-Prezidente Repúblika, José Ramos Horta iha Singapura, Xanana dismente. 

Nia dehan, loos duni Ramos Horta mós iha momentu ne'e iha Singapura hela, maibé sira la konsege tuur hamutuk hodi diskute asuntu ruma. 

“Ha’u hatene Horta ba atu halo konferénsia ou pidato besik ami hela ne’e, mais ha’u la hetan ou la hasoru nia ida,” esplika Xanana. 

Entretantu, nia informa, kuandu Horta kandidata-aan ba Prezidente Repúblika ne’e pertense ona partidu ida. Maibé partidu mak kandidata la’ós nia ketak no partidu ketak, ne’e problema.