Husi ai-funan ne’ebé haruka ba mate-uma ho mensajen badak Xanana hatete “Adeus Samba! Ami Sei Hamutuk ho Ó-Nia Familia”.
Mensajen Xanana nian hato’o diretamente husi oan mane Xanana nian, Kay Olo.
Tuir informasaun, Xanana seidauk bele vizita matebian hodi fó omenajen ikus iha matebian ninia rezidénsia, tanba sei halo viajen servisu iha Jakarta-Indonézia iha Segunda (01/07), maibé iha tempu besik sei fila mai hodi akompaña prosesu funebre matebian nian.
Iha tinan 1986 no 1987, Saudozu Jaime Ribeiro ‘Samba Sembilan’ sai hanesan eskolta ba Komandante Em Xefe, Kay Rala Xanana Gusmão no Xefe Estadu Maiór, Taur Matan Ruak.
Kronolojia
Tuir kronolojia, Samba Sembilan hakotu iis hafoin monu no hetan kanek iha parte kanoruk. Família sira kontaktu kedas ambulánsia Likisá nian maibé to’o tarde, entaun família deside tula de’it ho karreta mai Ospitál Nasionál Guido Valadares (HNGV), maibe labele ona salva ninia vida.
Oan mane saudozu, Aniceto Ribeiro hateten, kondisaun matebian nian di’ak hela. Iha kalan ne’e nia sai ba soe bee, derrepente rona katuas ne’e monu. Nune’e, ninia kaben lori mai kuartu laran, maibé haree kondisaun saudozu nian la estavel ona.
“Katuas monu maizumenus tuku 19:30. Nia monu ferik sai mai hiit nia, ninia iis ne’e ki'ik ona”, dehan nia, iha mate-uma, Ulmera, horisehik.
Nia dehan, bainhira hein ambulánsia atu transporta matebian kleur liu, entaun sira deside hodi tula ho karreta ba diretamente HNGV. Saudozu to’o iha ospitál maizumenus tuku 22:15 no ninia kondisaun labele salva ona.
Aniceto hateten, durante ne’e saudozu laiha moras ruma. Antes ne’e ba halo tratamentu iha Singapura kona-ba ninia matan. Nune’e, iha fulan Maiu 2019, ain bubu tanba kona ai, maibé kona-ba moras laran laiha.
Iha fatin hanesan, Veteranu António Pereira ‘Oan Timor’, rekoñese ambulánsia to’o tarde bainhira matebian hetan atake, bainhira tula sai husi Ulmera kondisaun saudozu nian krítiku ona.
“Ami triste tanba funu na’in ida husik-aan derrepente husi ita-nia leet, tanba la moras buat ida, monu depois to’o hakotu nia-vida”, dehan nia.
Observasaun diáriu ne’e nian iha mate-uma, matebian Samba Sembilan hetan vizita husi ninia kolega veteranu sira inklui na’in ulun sira husi instituisaun órgaun soberanu sira.
Biografia Samba Sembilan
Jaime Ribeiro ‘Samba Sembilan’ moris Likisá, 15 Abríl 1959. Partisipa iha luta libertasaun nasionál durante tinan 24, desde FALINTIL harii iha loron 20 Agostu 1975 to’o Timor-Leste nia independénsia.
Samba hahú ho postu soldadu iha Frente Armada husi 1975-1978 to’o zona libertada rahun. Hafoin Reorganizasaun Nasionál ba Rezisténsia iha 1981, asume kargu nu’udar komandante sesaun to’o 1985.
Husi 1986-1991 sai komandante pelotaun. Husi 1992-1999 asume kargu nu’udar segundu komandante rejiaun.
Hafoin dezmobilizasaun, Samba Sembilan fila ba vida sivíl, moris hanesan povu baibain to'o nia iis kotu.
Ba dedikasaun ne’e, iha tinan 2007, Samba kondekoradu ho Ordem da Guerrilha. Iha 28 Novembru 2018, Prezidente Repúblika, Francisco Guterres Lú Olo, kondekora Jaime Ribeiro ‘Samba Sembilan’ ho Kolár Orden Timor-Leste.
Hakoi iha Jardín Herois da Pátria
Xefe Estadu, Francisco Guterres Lú Olo, liuhusi Dekretu Prezidente Repúblika númeru 28/2019, rekoñese no valoriza kontribuisaun Jaime Ribeiro ‘Samba Sembilan iha prosesu luta libertasaun nasionál ho direitu atu hetan onra funebre no hakoi iha Jardín dos Herois da Pátria iha Metinaru, iha 5 Jullu 2019.
Tuir artigu 11 Konstituisaun RDTL konsagra rekoñesimentu no valorizasaun rezisténsia ba Povu Maubere ne’ebé kontra okupasaun no ba ema ida-idak ne’ebé luta ba independénsia nasionál. Bazeia ba Lei Estatutu Kombatente Libertasaun Nasionál fó omenajen ba Kombatente Libertasaun Nasionál.
