Vise-Primeiru-Ministru, Ministru Koordenadór Asuntu Sosiais, Ministru Dezenvolvimentu Rural e Habitasaun Komunitária Mariano ASSANAMI Sabino hatete, Internasional Finance Corporation (IFC) atu halo uma dignu no MDRHK mos iha polítiku mos ba dezenvolvimentu habitasaun entau presiza harii liña ministeriál ida.
Governante ne’e fó Ezemplu, parte ordenamentu territorial MPIE organiza, teknikamente MOP orienta, MAE haree ba área no MDRHC, hamutuk ho Governadór BCTL haree ba setor privadu nia inisiativa ne’ebé apoiu husi banku.
Tan ne’e, tuir planu Tipu uma ne’e atu implementa mak hanesan, Uma komersial, Uma komunitariu, Uma sosial, Uma subsidiu no Uma ba funsionariu sira.
“Polítika ita inisia, maibé ita sei halo koordenasaun interministerial depois ba aprezenta iha Konsellu Ministru (KM) depois halo aprovasaun,” dehan VPM, iha Edifísiu BCTL, Kinta horiseik.
Enkuantu, Ministeriu MDRHC, dadaun ne’e halo ezersisiu hodi produz lejizlasaun hodi regula habitasaun ne’ebé atu hari’i.
Entretantu, Governador BCTL, Helder Lopes hatete, politika governu relasiona ho dezenvolvimentu habitasaun komunitaria nian entaun parte BCTL sei koordena ho banku sira hodi hamosu produtu kreditu rua Housing Microfinace no Mortgage Market.
“Housing Microfinace katak, ema bele asesu kreditu osan hodi hadia uma, Mortgage Market katak, ema bele ba halo imprestimu hari’i, no sosa uma. Baihira programa dezenvolvimentu habitasaun la’o bele estimula kréditu iha Timor, dezenvolve setor privadu no kria empregu ba ita nia ema,” dehan Governadór
Nia afirma, Politika ida ne’e sai prioridade ba governu nian mak BCTL sei servisu hamutuk ho banku sira bele servisu hamutuk ho setor privadu halo programa komersializasaun habitasaun iha Timor.