Korpu ba Paz na’in hirak ne’e, sei serví hamutuk ho membru komunidade sira iha nasaun Timor-Leste ba tinan rua nia laran.
Enkuantu, ho pedidu husi Governu Timor-Leste nian, voluntáriu sira sei hanorin hamutuk ho manorin lian Ingles no servisu hamutuk ho parseiru sira iha setór dezenvolvimentu ekonómiku komunitáriu iha munisipiu sira hanesan, Bobonaro, Ermera, Líkisa no Manatuto.
Liu husi projetu sekundáriu sira, voluntáriu sira mós sei apoia inisiativa sira husi Prezidente Republika, José Ramos-Horta atu hadi'a nutrisaun no responde ba ra’es badak.
Voluntariu sira ne’ebé mai, marka fila fali prezensa Korpu ba Paz iha Timor-Leste dezde pandemia Covid-19 hahú.
"Ami kontente tebes atu simu fali voluntáriu sira iha Timor-Leste," dehan Jamie Fouss, Diretor Korpu ba Paz, iha komunikadu ne’ebé Online INDEPENDENTE sita, domingo ne’e (22/01).
Nia dehan, Korpu ba Paz orgullu tebes ho sira istória parseria ne’ebé naruk iha Timor-Leste, ne'ebé mai husi tinan 2002 bainhira voluntáriu Amerikanu sira foin primeira-vez mai iha Timor-Leste hodi apoia dezenvolvimentu komunidade Timor nian.
Nune’e hahú husi tempu ne'ebá kedas, voluntáriu sira husi Korpu ba Paz ajuda ona timoroan rihun ba rihun iha nasaun laran tomak atu dezenvolve sira-nia emprezariedade, empregabilidade no abilidade lian Ingles hanesan abilidade ne'ebé esensiál tebes atu promove Timor-Leste nia prosperidade ekonómika.
Tan ne’e, hahú husi evakuasaun globál ba voluntáriu sira husi Korpu ba Paz nian iha fulan-Marsu tinan 2020, Korpu ba Paz iha Timor-Leste servisu hamutuk ho Governu Timor-Leste no parseiru lokál sira hodi hamenus divulgasaun Covid-19.
“Funsionariu Korpu ba Paz tradús materiál informasaun kona-ba mitigasaun ba língua lokál sira husi Organizasaun Mundial Saude Covid-19 nian, empresta kondutór no karreta ba ekipa vasinasaun Ministeriu Saude nian, no pesoál médiku sira administra vasinasaun ba labarik eskola rihun ba rihun,”tenik komunikadu refere.
Aleinde, Korpu ba Paz mós suporta treinamentu liuhusi lian Ingles liuhusi semináriu sira iha munisípiu oin-oin no semináriu sira kona-ba dezeñu no jestaun projetu ba ONG lokál sira, governu lokál no grupu foin-sa'e sira.
Entretantu, Korpu ba Paz nu'udar rede servisu internasionál ba voluntáriu sira, membru komunidade sira, parseiru nasaun uma-nain sira, no pesoál sira ne'ebé lidera husi ajénsia nia misaun ba paz no amizade mundiál nian.
Ho nune’e, ho konvite husi governu sira iha mundu tomak, voluntáriu sira husi Korpu ba Paz servisu hamutuk ho membru komunidade sira iha projetu sira ne'ebé prioritiza iha área edukasaun, saúde, ambiente, agrikultura, dezenvolvimentu ekonómiku komunitáriu no dezenvolvimentu foin-sa'e sira.
Enkuantu, liu husi servisu ne’e, membru sira husi rede Korpu ba Paz dezenvolve abilidade transferavel no halibur kompeténsia interkultural ne'ebé tau Dezde Prezidente John F. Kennedy harii Korpu ba Paz iha tinan 1961, ema Amerikanu 240,000 liu serví ona iha nasaun hamutuk 142.
