Vítima Despezu administrativu Tasi-Tolu seidauk hamamuk Fatin Featured

By Ivonia Varela Jullu 04, 2024 790
Vítima despezu administrativu Tasi-tolu seida’uk hamamuk fatin, tanba seida’uk hetan sira nia direitu, maske Sekretaria Estadu Asuntu Toponímia no Organizasaun Urbana (SEATOU) fó ona orientasaun atu hamamuk fatin iha fulan-ne’e nia laran. Foto:INDEPENDENTE. Vítima despezu administrativu Tasi-tolu seida’uk hamamuk fatin, tanba seida’uk hetan sira nia direitu, maske Sekretaria Estadu Asuntu Toponímia no Organizasaun Urbana (SEATOU) fó ona orientasaun atu hamamuk fatin iha fulan-ne’e nia laran. Foto:INDEPENDENTE.

DILI: Vítima despezu administrativu Tasi-tolu seida’uk hamamuk fatin, tanba seida’uk hetan sira nia direitu, maske Sekretaria Estadu Asuntu Toponímia no Organizasaun Urbana (SEATOU) fó ona orientasaun atu hamamuk fatin iha fulan-ne’e nia laran.

Komunidade Imaculada Araújo hatete, sira koopera ona ho estadu atu sai husi hela fatin hodi kontribui ba dezenvolvimentu nasaun nian, maibé, husu ba governu atu fó uluk sira-nia direitu molok sai husi hela fatin.
“Ami prontu atu sai, maibé bainhira ami atu sai tenki ganti rugi uluk foin ami sai,” dehan Komunidade ba Jornalista INDEPEDENTE iha Tasi-tolu
Nia afirma, bainhira estadu la fó sira-nia direitu maka sira sei la sai husi hela fatin, tanba atu sai husi fatin ida ba fali fatin seluk hodi harii fali uma foun mós presiza osan.
Komunidade Fernando Maia hatete, hanesan povu prontu atu oferese fali rai estadu ne’ebé sira hela, maibé governu tenki hatene mós sira-nia direitu.
Nia dehan, bainhira governu la fó sira nia direitu mak sira sei la sai husi fatin refere.
“Ami povu mak ne’e, fatin ne’ebé estadu nian, ami prontu atu oferese maibé estadu mos tenki hatene ami povu ia direitu, maibé se orsamnetu la iha ma kami sei la sai,” dehan nia.
Nia hatutan, bainhira governu liuhusi SEATOU mak hasai sira ho obrigatóriu, sira sei dada fali lona iha hela fatin hodi hela ba.
Enkuantu, komunidade Lorena de Fátima hateten, uma ne’ebé dadaun ne’e sira hela ba, la’os estadu mak hari, tanba ne’e banhira estadu atu hasai sira tenki hare didi’ak. Tanba sira hela iha fatin refere durante tinan barak ona.
“Uma ne’e la’os estadu mak halo, ami uza kosar ben mak halo, no ami mos hela iha ne’e tinan naruk ona hahú husi 2005,” nia deklara.
Tuir dadus, komunidade tasi-tolu ne’ebé afeitadu ba eviksaun ne’e hamutuk uma-kain atus rua resin.
Entretantu, rekorda fila-fali katak, antes ne’e ekipa konjunta ne’ebé lidera husi SEATOU halo ona diálogu ho komunidade Tasi-tolu no husu komunidade sira atu hamamuk fatin hahú iha loron ida fulan-Jullu tinan ne’e.

Rate this item
(0 votes)

Independente Digital TV