Vise Bankada KHUNTO, Luis Roberto da Silva hateten, tinan naruk ona povu Timor Leste moris ho liberdade no independensia, maibé sira ne'ebe hela iha área remota dook husi sidade ka munisipiu sira nafatin preokupa kona-ba seidauk asesu ahi eletrisidade.

"Aldeia 6 husi Suku Maina 2, Maina 1 , Postu Lautem - Munisipiu Lautem (Zona Alto Laleno) ne’ebé uluk sai baze ba gerileiru sira, infelizmente populasaun aldeia ne’en iha fatin refere kalan sei sunu kamii no ahi tradisional,” dehan nia, iha plenaria Parlamentu Nasional, horisehik.

Nia hatutan, iha 2015 liu ba autoridade lokal hamutuk ho veteranu sira submete ona proposta ba Ministerio Obras Publica (MOP) no Vise Ministru Eletrisidade e Saneamento, iha 2018 kompania mobiliza ona material balun hanesan ai-rin maibe ate momentu ne´e seidauk iha serteza.

"Ita la hatene bainhira los maka atu instala energia eletricidade ba populasaun sira iha aldeia 6 refere no ita ladauk hare iha lista projeitu anterior nian", deputadu né'e reokupa. Tanba ne´e Bankada Khunto husu ba Ministerio relevante aseleira ona prosesu sira atu ita nia comunidade bele asesu ona eletricidade hanesan ho suku seluk, nune´e mos kompania nebe mobiliza ona matérial balun labele sai fali vitima", nia rekomenda.

Entretantu, hatan preokupasaun husi deputadu sira nia, Prezidente Parlamentu Nasional (PPN) Maria Fernanda Lay husu tekniku husi Vise Ministru Asuntu Parlamentares rejista hotu preokupasaun ne’ebé deputadu sira aprezenta hodi enkamina ba membru governu sira.

"Destintus deputadu sira tanba membru Governu la iha ne’e, maibé ha'u espera katak tekniku sira iha ne’e bele rejista hotu preokupasaun ne’ebé deputadu sira aprezenta vise Ministru Asuntu Parlamentares hodi enkamina ba membru Governu relevante sira," Hatan Prezidente Parlamentu Nasional (PPN) Maria Fernanda Lay.