Vise Primeiru Ministru, Ministru Koordenadór Asuntu Ekonómiku, no Ministru Turizmu Ambiente hatete, durante ne’e nia rona beibeik media sira públika katak aimoruk laiha.
"Ha'u rona bebeik ita-boot (jornalista) sira dehan aimoruk laiha. Purezemplu loron rua liu ba foin mak ahi mate derepente de'it (iha HNGV) media sira iha ne’ebá ona ‘oiii.. ahi mate ona’. Ha'u rasik ba to'o iha ne’ebá, ha'u ba haree, sim (ahi) mate duni."
“Ahi mate duni dala tolu, ida primeiravez 10 minutu, segundavez 7 minutu, ida terçeira vez ne'e hafoin sira deskobre duni ona dehan katak makina ida iha kotuk ne'e mak faila tanba iha fiu ruma mak faila iha besik mai iha Bidau nian, ne'ebé ida ne'e mak fó impaktu.”
"Maibé ha'u tama ba iha ruangan sira, hotu-hotu ha'u haree, ikus mai mós Vise Ministru Saúde tama ba ami na'in rua hamutuk ba iha fatin pperasaun. Iha fatin operasaun iha nia jerador rasik ke laiha problema ahi mate jerador ne'e moris kedas no depois ba iha sala ICU ho fatin sira seluk ha'u tama ba," dehan Kalbuadi ba jornalista sira iha salaun Gabinete Vise PM, Farol, Sesta (24/05).
Kona-ba aimoruk, nia hatutan, nia mós ba haree rasik aimoruk iha armajen no tuir nia aimoruk ne’e iha hela so menus de’it.
"Aimoruk sira dehan laiha, laiha, laiha. Sim ha'u tama ba haree, ha'u la hatene loloos aimoruk ne'e iha duni 100% ka sei falta balun. Mais ita-boot sira dehan aimoruk laiha liu ne'e ha'u rona de'it, rona, rona, rona. Ha'u husu média sira bele haree ba hamutuk ho Ministériu Saúde leno took aimoruk sira ne'ebé mak iha, ne'e ha'u dezafia ita-boot sira ba took leno."
“Se ba to'o iha gudang sira dehan aimoruk ne'e laiha duni, entaun Governu tenke foti asaun ruma, mais karik aimoruk balun mak falta, ne'e labele nega dehan laiha, dala-ruma falta karik,” dehan nia.
Molok ne’e, Diretór Klínika Bairo-pite, Kewen Robert Lu Pereira hatete, aimoruk stock out iha klinika Bairo-pite iha item 39, ne’ebé maioria nu’udar aimoruk esensial.
“Agora ami iha 39 item mak stock out, ne’e maioria aimoruk ne’ebé ita uza beibeik ka aimoruk esensiál mak hanesan amoxicillin, amoxiclav no xarope ba labarik sira nian no ba pasiente sira ne’ebé tensaun, raan midar,” informa Kewen iha nia knar-fatin, Bairo-Pite, Tersa (14/05).
Baibain bainhira stock out iha klinika ne’e, nia parte hato’o pedidu emerjénsia ba INFPM no sira haruka responde kedan, maibé daudauk ne’e tanba iha INFPM mós stock hotu, entaun sira labele responde ho karatér emerjénsia.
Atu problema stock out ne’e labele afeita maka’as liu tan ba atendimentu ba pasiente sira, nia dehan, doutor sira fó opsaun balun hanesan troka ho aimoruk seluk ne’ebé nia funsaun hanesan, ka fó reseita ba pasiente sira hodi ba hola rasik iha klinika ka farmasia privadu.
"(aimoruk) ne’ebé laiha ami fó fali aimoruk seluk ne’ebé iha ka vitamina, buka maneira oinsa atu pasiente bele hetan aimoruk nafatin, tanba nia funsaun aimoruk hanesan," dehan nia.
Ba aimoruk estomagu nian, Diretór ne’e hatete, laiha hotu kedas nune’e sira pasa reseita ba pasiente sira hodi sosa rasik.
“Governu nia aimoruk ba estómagu oin rua de’it Antasida ho Promethazine, maibe rua ne’e stock laiha hotu,” dehan nia.
Situasaun hanesan akontese mós iha Sentru Saude Manufahi. Aimoruk esensial hanesan Paracetamol no amoxicillin ne’ebé pasiente sira tenke hetan diariamente laiha hotu ona.
Iha Sentru Saude ne’e, aimoruk item 11 mak stock out, hanesan Amoxilin tab., Parcetamol Tab, Diclo Tab, Ibuprofen Tab, Erythromyci tab., Vitamin B1 tab., Vitamin C tab., Cloxa Syrup, Bromhexine Syrup, hydrocortisone injeksi, no Kanula.
