Ministra Dulce husu Komunidade okupa areadór Eskola prepara hamamuk Fatin Featured

By Cesarina de Carvalho Maiu 27, 2024 244
Ministra Edukasaun (ME), Dulce de Jesus Soares. Foto:Dok. Ministra Edukasaun (ME), Dulce de Jesus Soares. Foto:Dok.

DILI: Ministériu Edukasaun (ME) sei koordena ho Ministériu Administrasaun Estatál (MAE) halo karta sirkulár ba okupante sira iha areadór eskola sira.

Ministra Edukasaun (ME), Dulce de Jesus Soares husu ba komunidade atu prepara sira-nia aan hodi hamamuk fatin, bainhira sira simu karta sirkulár sira.

"Atu fo hatene ba sidadaun hotu-hotu ne'ebé oras ne'e sei okupa hela iha resintu eskolár sira atu bele prepara sira-nia aan, hodi hamamuk fatin ne'e bainhira karta ne'e too iha eskola sira, bainhira karta ne'e to’o sira tenke hamamuk fatin ne'e," dehan Ministra, Dulce, iha knaar fatin, Vila-Verde sesta, (24/05).

Okupante sira tenke hamamuk areadór eskola ne'ebé sira okupa, atu nune'e governu bele utiliza fila-fali fatin ne'e hodi halo ba sala-de-aula no halo atividade seluk ne'ebé relevante ho eskola nia.

Diretór Servisu Edukasaun Munisípiu Dili, Sabino da Costa Perreira hatete, komunidade sira ne'ebé hela iha areadór eskola tenke prepara aan bainhira karta husi Ministériu Edukasaun tuun mai katak sira tenke hamamuk fatin refere.

"Ita iha ona pedidu husi diretór eskola sira, no Ministériu Edukasaun mós sei halo karta ida hodi haruka ba eskola sira, atu hasai komunidade sira ne'ebé mak okupa areadór eskola ne'e, ne'ebé ita husu ba komunidade sira mós tenke preparadu ona, nune'e karta mai ne'e hamamuk ona," dehan nia.

Adjuntu Diretór Eskola Bázika Sentrál 10 Dezembru Comoro, Nicolau Amaral hatete, komunidade liuliu xefe família 14 ne'ebé hela iha arredór eskola EBC 10 Dezembru ne'e prejudika tebes prosesu aprendizajen loro-loron nian iha sala-de-aula.

"Ida-ne'e prejudika tebes ita-nia prosesu aprendizajen. Ha'u fó ezemplu, uluk tempu Indonézia nian, profesór sira hela iha ne'e, ne'e ema ho nia maturidade no dedikasaun ne'ebé mak hela hanesan ne'e kontribui ba silénsiu. Maibé, ita agora ne'e pelu kontráriu, tanba hela tiha arredór eskola no ami dirijente bolu atensaun ba sira maibé nafatin de'it. Ita-nia situasaun mak nune'e, no hein de'it desizaun hosi Ministériu Edukasaun," nia informa.

Okupante resintu eskola 10 Dezembru Comoro, Sebastião Berbisa hatete, sira hela iha areadór eskola durante tinan barak ona, maibé estadu hakarak hasai sira sira prontu kopera estadu maibé tenki hasai  ho digno tanba sira mos sidadaun Timoroan hotu.

Nia dehan, sira mai hela iha areadór la'os hakarak mai hela de'it maibé situasaun moris mak obriga tanba ne'e sira hela iha fatin refere hodi sira nia aktividade buka moris hodi sustenta estudu ne'e to'o remata.

"Ami hela iha Ne'e durante tinan 14 ona hahú husi 2009 até agora, ami hela iha ne'e nudar estudante iha momentu krize entre Lorosa'e ho loromonu tanba fatin ne'ebé ami hela ba ne'e la seguru, tan ne'e mai hela iha ne'e to'o estudu ne'e remata no sai tiha profesor mos," dehan nia.

Adjuntu Diretór Eskola Ensinu Sekundáriu Jerál (ESJ) 4 Setembru UNAMET Balide, Alexandre da Costa informa, komunidade ne'ebé hela rabat iha resintu eskola ne'e iha xefe familia tolu ka haat maibé iha ambiente eskola ne'e iha parte kotuk ema kuaze aldeia ida mak hela, ida-ne'e perturba tanba sira tama-sai iha arredór eskola, halo profesór no estudante la atensaun ba hanorin no simu matéria.

"Ambiente eskola 4 Setembru UNAMET ne'e la kontribui atu garante kualidade edukasaun ensinu prosesu parendizajen, tanba konsentrasaun alunu ba matéria mak susar. Labarik sira lori sásan ba hamriik iha janela eskola nian, to'o iha balun ne'ebé tama to'o aula laran. La'ós ida-ne'e de'it maibé iha balun ne'ebé hela iha laran ne'e, lori mikrolete no taxi para iha ambiente eskola nia, to'o mikrolet ida para iha varanda eskola nia," dehan nia.

Okupante resintu Eskola ESJ 4 Setembru UNAMET, Berta do Rego hatete, prontu koopera ho Governu atu husik hela fatin ne'e.

"Ami bele husik mamuk fatin ne'e maibé presiza konsidera ami tanba ami iha ne'e kle'ur ona, dezde 1999 to'o agora. Ami hela iha ne'e tanba ha'u-nia katuas-oan servisu iha Ministériu Edukasaun," nia hateten.

Berta do Rego hatutan, iha arredór eskola ne'e komunidade barak la'ós sira mesak de'it maibé nia parte hein de'it desizaun husi Governu bainhira hateten sai ne'e nia parte pronto atu koopera.

Eskola hirak ne'ebé komunidade okupa mak, Eskola Ensinu Sekundária Jerál (ESJ) 10 Dezembru Comoro, Eskola Ensinu Sekundáriu Jerál 4 Setembru UNAMET Balide, Eskola Ensinu Báziku Sentrál (EBC) Bidau akadiru hun, Eskola Sekundária Tékniku Vokasional Industria no Teknolojia (ESTVIT) Becora.

Rate this item
(0 votes)

Independente Digital TV