Diretór Apoiu Servisu Diagnóstiku no Therapiotika iha HNGV, Vidal de Jesus Lopes hatete, husi kazu 139 ne'e, kompostu husi labarik ki’ik hamutuk 97 no ema-boot na’in 42.

"Durante fulan 3 iha HNGV ita rejista pasiente ne'ebé mai ho kazu Dengue hamutuk 139, husi númeru ne'e, maioria afeita ba labarik ho idade ki’ik," dehan nia iha HNGV, Sexta (24/05).

Kazu Dengue ne’e, nia dehan, maioria afeita ba labarik ki’ik sira tanba iha tempu udan susuk tolun iha bee nalihun sira, entaun ida ne'e mak afeita ba labarik sira.

Tanba ne'e, HNGV husu ba komunidade sira, tenke hamoos bee ne'ebé nalihun iha valeta ku’ak no hamoos uma huun sira, atu nune'e bele prevene husi moras Dengue.

Durante fulan 5 hahú husi fulan-Janeiru to'o Maiu tinan ne'e Servisu Saúde Munisípiu (SSM) Dili rejista kazu Dengue 556.

Diretór Servisu Saúde Munisípiu (SSM) Dili, Mateus Pinto hatete, husi kazu sira ne'e maioria afeita ba labarik ho idade 5 to'o 14.

"iha fulan 5 nia laran hahú husi fulan-Janeiru to'o loron 20 fulan-Maiu ne'e ita rejista ona kazu Dengue hamutuk 556, ne'ebé afeita maka’as liu ba iha labarik ho idade 5 to'o 14," dehan nia.

Tuir dadus ne'ebé SSM Dili rekolla, mairoria mai husi Sentru Saúde Komoro, Sentru Saúde Vera-Kruz no Sentru Saúde Bekora.

Husi janeiru mai to'o agora foin 556, nia akresenta, kompara ho tinan kotuk ne’e sa’e 1000 resin, entaun mate iha tinan kotuk hamutuk 35, maibé iha tinan ida ne'e mate foin ema ida iha Munisípiu Dili nian.

Atu halo prevensaun ba kazu Dengue, ekipa saúde nafatin halo promosaun no fomigasaun ba iha komunidade sira, atu nune'e bele prevene an husi moras Dengue.