Ministru Transporte no Komunikasaun, Miguel Marques Manetelu hatete, iha posibilidade planu sosa bus ne’e sei bele realiza iha tinan ida ne’e nia laran.

"Ohin ha'u hatete ha'u halo ona reuniaun dala ida ho nain ba mikrolete sira ne'ebé halai iha jalur utama, ne'e ha'u temi ida be Rotunda (estátua) Nicolau Lobato tuir estrada boot depois ba to'o Bidau Senggol. Se buat hotu lao di'ak, iha tinan ida ne'e ita bele hahú sosa bus," dehan nia ba jornalista sira iha Timor Plaza, Kinta (23/05).

Ba Mikrolete, nia dehan, sei kontinua ho sira-nia mikrolete, governu nafatin respeita sira tanba loloos atu implementa programa governu nian, governu la ba konsulta ho sira mais hanesan Timor-oan hakarak bolu sira tanba tempu naruk sira halai ona Mikrolete iha jalur ne'e.

"ita hakarak ko'alia ho sira par sira partisipa mais ne'e sira-nia direitu, ita kontinua lao ho buat ne'ebé governu nia planu."

Operasaun husi bus ne’e, nia dehan, bele mós ba to'o iha rotunda Tibar.

“Bele sosa (bus) entre 5 to'o 10 par sirkula,” dehan Ministru ne’e.

Kona-ba osan sosa bus ne’e, Manetelu dehan, bainhira MTK mak sosa ema hanoin MTK halo fali negosiu. Iha posibilidade karik osan sosa bus ne'e laiha, governu fasilita de'it setor privadu sira ne’ebé hakarak hatama bus.

“Se ema atu sosa kotu la di'ak entaun ko'alia ho BNCTL par ema bele empresta osan," dehan nia.

Ba modelu bus, nia dehan, laos buka ida ne’ebé modernu liu maibé ida ne’ebé ema sente seguru.

Lansa planu mestre transporte públiku

Ministériu Transporte Komunikasaun halo lansamentu ba Planu Mestre Transporte Públiku ne'ebé ekipa husi Banku Ajensia Dezenvolvimentu (ADB) entrega.

"Ohin ita halo lansamentu Planu Mestre Transporte públiku nian, iha faze tolu mak iha ba planu mestre ne'e, ba kurtu prazu, médiu prazu no longu prazu ne'e to'o 2035. Sira ADB sei kontinua planu mestre, ohin mós temi katak estudu viabilidade ne'e antes Agostus remata sira sei entrega," informa Ministru Miguel Marques Manetelu.

Husi estudu viabilidade ne’e, nia dehan, sei halo dezeñu ba nia kustu ba fazeadamente nune’e bele hatene atu implementa uluk ida ne'ebé.

Nu’udar Ministru Transporte no Komunikasaun iha governu dasia, nia dehan, halo ezersisiu hotu-hotu atu hadia, moderniza no dezenvolve setor transporte públikus hodi hatan ba demanda populasaun nian no kria kondisaun ba kresimentu ekonomiku.

Planu mestre ida ne'e sai nu’udar fronteiru transporativu ida ba setor transporte públiku sira iha Timor-Leste, no hein katak iha periodu governasaun nono governu nian planu mestre hatuur vizaun ida ne'ebé dook, katak transporte públiku iha Timor-Leste sei atrativu, sei asesivel, sei inkluzivu, akomoda transporte sira ne'ebé atu apoiu ba kresimentu ekonomiku, dezenvolvimentu urbana, no hasa’e kualidade moris Timor-oan sira iha nasaun tomak.”

“Ne'e katak ita-nia tranporte pûbliku tenke ba oirenta hasa’e kresimentu ekonomiku, transporte públiku ne'ebé asesivel ba ema hotu no halo sidade sai furak ka organizadu.”

"Ho planu mestre ne'ebé ita lansa sei tulun hodi transforma sistema transporte públiku sira Timor-Leste, liu husi transforma servisu no atendimentu, hasafil konektividade entre urbana ho rural, Dili ho Munisipiu," dehan nia.

Ministru ne’e hatutan, planu mestre ida ne'e mós sei fó enfaze hodi halo reforma nesesariu, regulamentu, hasa’e kapasidade servisu públiku sira nian, no tulun governu atu hatene kustu investimentu ne'ebé presiza ba dezenvolve transporte públiku iha TL.