Diretor DTSRN Superintendente Assistente Polísia Luis da Costa informa atividade polísia Tranzitu halo check point ba Transporte ne'ebé sirkula iha kapitál Dili, ne'e hanesan planu operasaun seminal nian hodi implementa loron-loron iha estrada publiku hodi impoin lei ba transporte públiku.
“Ita halo atividade check point ba transporte iha área Juridiku kapital Munisipiu Dili atu apoiu polísia Tranzitu Munisípiu Dili bele impoin regra Lei Kodigu Estrada ba sidadaun ne'ebé konduz transporte hanesan motor no Kareta tenki kumpri ba lei,” Online ne’e sita iha komunikadu, tersa ne’e (04/03/25).
Superintendente Assistente Polísia ne’e haktuir tan katak atividade check point ne'e mós parte ida halo prevensaun ba ema deskuñesidu sira ne'ebé sempre naok motor iha fatin ida, hafoin lori ba fa’an fali iha Munisípiu seluk iha Teritoriu Timor-Leste.
"Ohin ita halo operasaun check point ita konsege prende motorizada hamutuk 48 no dokumentu ha’at (4), ne'ebé sidadaun sira komete infrasaun laiha karta kondusaun, lori dokumentu ne'ebé liu ona prazu ida sira viola lei Kódigu estrada númeru 06/2003," haktuir komunikadu refere.
Entretantu, motorizada ne'ebé parte DTRSN prende sei asegura iha edifisiu Kuartel jerál PNTL, bainhira motorizada na’in kumpri ona selu koimas iha banku BNCTL, hafoin entrega ba fali evidensia motor sira ne'e ba nain.
