“Di’ak liu ministru sira viajen menus. Konsentra ida-idak nian servisu. Deputadu sira viajen menus. Konsentra ida-idak nian servisu”, dehan nia, iha Palásiu Governu, Sesta (24/5).
Tuir eis-Ministru Negósiu Estranjeiru (MNE), membru governu ka deputadu sira halo viajen ba fatin hotu-hotu, maibé fila haluha ona objetivu husi viajen ne’e rasik. Haluhan ona memorandum of Understanding (MoU) ida asina ne’e laiha ezekusaun no laiha follow up. Ne’e duni, dalan di’ak liu maka poupa, osan lalika viajen.
Tanba ne'e, nia sujere ba Governu atu hatún orsamentu viajen nian, pelumenus 50% husi totál agora daudaun nian no mantein ba orsamentu Ministériu Negósiu Estranjeiru no Kooperasaun (MNEK) nian.
“Úniku ke ita mantein maka negósiu estranjeiru. Maibé, ba ministériu sira seluk ne’e konsentra ba idak idak nian servisu. Ita halo viajen beibeik depois la halo servisu”, dehan Horta.
Antes ne’e, Vise-Ministra Finansas, Sara Lobo Freitas hateten, despeza ne’ebé tuir planu sei hamenus iha Orsamentu Jerál Estadu (OJE) 2020 maka viajen estranjeiru no aluga veíkulu.
Governu oras ne’e daudaun elabora ona dadus sira ne’ebé presiza relasiona ho despeza la importante sira ne’ebé durante ne’e halo, hodi bele minimiza iha orsamentu jerál tuir mai.
Nune’e, Xefe Governu, Taur Matan Ruak, mós tuir planu sei halo reuniaun inter-ministeriál hodi haree hamutuk kona-ba despeza Estadu nian ne’ebé la nesesáriu hodi fó naha boot ba OJE kada tinan.
