Tuir akuzasaun husi Ministériu Públiku (MP) iha 2 Jullu 2018 arguidu prinsipal ho inisial NX hamutuk ho arguidu na’in tolu (3) seluk ho inisial NXB, JT, no ADJ planu duni atu oho Vera.

Bainhira sira oho vitima, MP hatete arguidu ADJ no JT mak kaer vitima nia liman, no arguidu NX mak kaer katana hodi ta’a vitima nia ulun dala rua (2), hasan dala ida (1), liman dala ida (1), no lori katana nia tutun sona vitima nia kotuk laran dala tolu (3).

“Bainhira vitima hakilar, arguidu NX hasai nia faru sulan ba vitima nia ibun hodi nia lian labele sai,” dehan MP iha ninia akuzasaun.

Ba akuzasaun husi MP, arguidu ADJ hatete nia laiha koñesimentu ba Vera ninia mate. Nia so rona husi arguidu NX bainhira sira halo uma iha Likintai katak arguidu NX nia doben lakon.

“Ha’u hatene arguidu NX tanba ami kolega ransu, serbisu hamutuk halo uma iha Likintai,” dehan arguidu iha sala audensia TMD, Segunda (27/05).

Iha fatin hanesan, arguidu JT deklara katak nia la envolve iha kazu oho Vera.

Nia hatete, iha 1 Jullu 2018 nia sobu hela tenda iha nia primu nia uma ne’ebé halo festa aniversariu. Tan ne’e iha kalan nia ho kondisaun lanu toba iha Etus (sasin) nia uma.

“Iha dader mak arguida NX ba fó hatene Etus katak atu ba tula Vera iha Kristu Rei tanba Vera iha ne’ebá,” dehan arguidu JT.

Hafoin ida ne’e, arguidu ne’e konta, Etus lori karreta ho marka Honda Jazz atu ba tula Vera.

“Maibé to’o iha fatin akontesimentu la tula Vera, arguidu ho testamuña sira buka fali Vera,” dehan nia.

JT dehan, vitima ho arguidu NX sei iha relasaun familia tanba vitima nia maun mak kaben ho arguidu nia tian.

“Ha’u koñese Vera tanba uluk nia mós hela iha Likintai.”.

Tan ne’e, arguidu jura ba tribunál no temi rai lulik sira katak se nia mak oho Vera ka liman foer nia mós sei mate iha prizaun laran, tanba krime ne’e hakotu ema-nia vida.

Rona tiha deklarasaun husi arguidu na’in rua, tribunal deside adia julgamentu ba 10 Juñu 2019 tuku 15:30 Otl hodi rona testamuña sira  ne’ebé MP temi iha akuzasaun laran.

Molok ne’e, arguidu prinsipal NX mós deklara nia la oho vitima maibé vitima lakon.

Arguidu NX rekoñese katak nia ba husu lisensa ba vitima nia maun atu nia ho vitima ba aprezenta an iha vitima nia inan-aman iha Likidoe.

Maibé, arguidu dehan, to’o iha dalan klaran vitima hatete nia lakohi ba foho maibé hakarak ba Kristu Rei,.

“Ha’u halo tuir vitima nia hakarak. Ami ba Kristu Rei nia kotuk, Dolog-oan, durante kalan ida,” dehan arguidu.

“Iha deder, vitima fanu ha’u dehan hamalaha, entaun momentu ne’e tanba ha’u osan laiha ha’u husik hela nia iha Kristu Rei.

Iha momentu ne’ebá, arguidu dehan, nia la’o ain de’it husi Kristu Rei mai Likintai atu foti hahan no bolu nia maun atu ba tula sira na’in rua.

“Nia mak haruka ha’u ba bolu ha’u-nia maun sira iha Likintai atu ba tula ami na’in rua, maibé depois ami fila mai Vera lakon tiha ona. Laos ami mak oho, ha’u-nia liman la raan hasoru Vera,” deklara NX.

Entretantu, tuir akuzasaun husi MP, iha tinan 2015 to’o 2016 arguidu NX ho vitima hela iha señora Roza nia uma iha area Likintai, Taibesi. Arguidu NX iha relasaun domin ho Vera.

MP konta tuir katak, iha 30 Juñu 2018 tuku 16:00, arguidu NX ba hasoru nia doben Verra iha Kampung Alor, atu lori ba Likintai no toba iha ne’eba.

Iha 1 Jullu 2018 dader, arguidu NX ho vitima sai husi uma Likintai  hodi ba fali vitima nia uma iha Kampung Alor, ho objetivu atu hasoru malu ho vitima nia maun.

Hafoin hasoru-malu, vitima nia maun aseita no autoriza vitima ho arguidu atu ba Likidoe hodi aprezenta arguidu nu’udar doben ba vitima nia inan-aman.

Maibé bainhira to’o iha palasiu Governu nia oin, arguidu ho vitima diskuti-malu kona-ba asuntu ne’ebé la klaru, nune’e arguidu ho vitima la ba Likidoe maibé ba fali Kristu Rei.

“Arguidu NX lori vitima ba iha ne’ebá toba kalan ida, depois halo tan relasaun seksual ho vitima,” dehan MP.

MP dehan, tuir faktus iha loron rua antes, arguidu konsege kaer toman vitima halo relasaun domin ho mane seluk ho naran iha vitima nia uma Kampung Alor.

Nune’e, iha 2 Jullu 2018, arguidu NX telefone nia maun, arguidu NXB hodi lori karreta no katana ba iha area Kristu Rei atu oho vitima.

“Antes ne’e arguidu sira iha ona planu. Ema ne’ebé mak halo planu atu oho vitima mak hanesan arguidu NX, NXB, ADJ no JT, no planu ne’e sira halo iha area Likintai nian”.

Hafoin kontaktu, arguidu na’in tolu (3), NXB, ADJ, no JT lori karreta ba Kristu Rei.

“To’o iha ne’eba, arguidu ADJ no JT mak kaer vitima nia liman, no arguidu NX mak kaer katana hodi ta’a vitima nia ulun dala rua (2), hasan dala ida (1), liman dala ida (1), no lori katana nia tutun sona vitima nia kotuk laran dala tolu (3).”

“Bainhira vitima hakilar, arguidu NX hasai nia faru sulan ba vitima nia ibun hodi nia lian labele sai,” MP akuza.

Konsekuensia dereita no nesesariu ne’e husi arguidu nia hahalok tomak halo vitima mate iha fatin. Hafoin arguidu sira tula vitima nia mate-isin  ho karreta to’o iha eis loza Hello Mister nia oin sosa sinelus kór pink atu fó hatais vitima.

Iha momentu arguidu sira lori mate-isin ba hakoi subar iha Subaun, MP dehan, arguidu NX hasai nia jaket hodi falun mate-isin.

“Depois ne’e arguidu sira fila ba uma iha Likintai halo juramentu, fase estatua Kruz Jesus nian iha ortoriu, hoban ba bee, katak labele kolia sai lia oho ne’e ba ema ida”.

Liu tiha loron ida, arguidu NX rasik lori vitima nia xiñelus ba Kampung Alor hodi hatete ba vitima nia familia katak vitima halai lakon.

“Arguidu sira ezekuta sira-nia planu hodi halakon vitima nia vida ho livre de liberada no konsientemente duni,” dehan MP.