Bazeia ba informasaun inisiu husi PNTL, liu husi Xefe Seksaun Polisia Tranzitu Munisipiu Dili, Inspetor Domingos Sarmento Gama, Padre Abito mate tanba uniku asidente (kecelakaan tunggal) iha ninia viajen husi Dare ba Dili.

Informasaun husi polisia ne’e ho baze deklarasaun husi sasin no rezultadu sena fatin akontesimentu (hasil olah tempat kejadian) ne’ebé halo hafoin asidente refere akontese iha 22 Agostu, tuku 8.30 kalan.

Tuir parte polisia, uniku asidente ne’e envolve ema na’in rua; Padre Abito ho feto ida ho inisial MSR.

Tuir informasaun husi MSR ba polisia katak, iha 22 Agostu, Padre Abito ne’ebé hela iha Seminário Maior Interdiosezanu São Pedro no São Paulo, Fatumeta, Dili, haruka mensajen ida ba nia hodi husu atu sira ba haan hahaan ruma iha area Dare.

MSR ne’ebé hela iha area Ailok-Laran aseita no ikus mai Padre Abito tula MSR ho motor marka Jupiter MX kór azul ho xapa matrikula E.8081 TL.

Maibé bainhira to’o iha dalan klaran, tanba rai nakukun ona, sira deside fila fali mai Dili.

Padre Abito ne’ebé kondus motor halai husi diresaun seminariu Dare nian ba diresaun dalan foun rezidensia Mauhoka nian.

Bainhira halai tuun ba rai loloon iha Dare nia okos, tuir relatoriu asidente trafiku PNTL katak, Padre Abito la konsege kontrola motor ho nune’e motor halai sees husi dalan no monu tuun ba valeta kuak.

“Tuir informasaun ita-nia sidadaun feto ne’e deklara katak Amu mak SMS hodi konvida malu atu sira na’in rua ba haan hahaan ruma iha Dare, maibé sira na’in rua lao to’o iha dalan klaran haree ba kondisaun rai ne’e kalan ona, sira fila fali mai to’o iha dalan foun husi Dare nian tuun mai liu husi dalan señor Mahoka nia uma leten ne’e, entaun halai sees soke moru ida ne’ebé halo hanesan penahan ne’e, sira monu liu ba valeta kuak,” informa Inspetor Domingos, loron ida hafoin akontesimentu.

Hafoin akontesimentu ne’e, PNTL Dili simu informasaun no haruka kedan ekipa ba fatin akontesimentu.

Iha momentu ne’ebá, tuir relatoriu asidente husi PNTL, Padre Abito ne’ebé sofre kanek todan seidauk mate no karreta privadu ida mak ajuda hodi tula Padre Abito ho MSR ba Hospital Nasionál Guido Valadares hodi halo tratamentu.

“Karreta privadu ida mak ajuda lori ba HNGV hodi halo tratamentu, maibé motorista (Padre Abito) labele salva no mate iha HNGV,” relatoriu asidente ne’e hakerek.

Tuir relatoriu ne’e, Padre Abito sofre kanek todan iha nia ulun no MSR sofre kanek kaman iha nia ibun no ain-tuur kuanan. MSR mós sente moras iha nia hirus-matan no kotuk-laran.

MSR Seidauk Aprezenta An ba PNTL

Komandante PNTL Munisipiu Dili, Superentidente Xefe Polisia Henrique da Costa informa, vitima ho inisial MSR ne’ebé deskonfia hetan asidente ho matebian Padre Abito iha 22 Agostu iha area Dare seidauk aprezenta an ba PNTL.

“To’o agora vitima MSR ne’ebé deskonfia dehan hetan asidente hamutuk ho matebian Padre Abito José Brites Casimiro ne’e, seidauk mai aprezenta an ba parte PNTL,” dehan Henrique ba jornalista sira iha nia knaar fatin, Kaikoli, Dili, Kinta (25/08).

Kona-ba prosesu ba kazu ne’e, Henrique hatete, investigasaun ne’e barak, bele mai iha parte investigasaun iha Komandu Munisipiu Dili, bele ba iha nasionál no bele ba iha Polisia Servisu Investigasaun Kriminal (PSIK).

Nia hatutan, parte Tranzitu Munisipiu Dili halo ona prosesu ba kazu asidente trafegu ne’ebé akontese, enkuantu ba kestaun seluk seidauk prosesu, tanba vitima MSR seidauk aprezenta an.

“Evidensia sira ne’e prosesu iha ita-nia Tranzitu Dili nia liman no prosesa ona ba iha Ministériu Publiku,” katak nia.

Tuir informasaun ne’ebé jornal INDEPENDENTE hetan, kazu ne’e iha ona PSIK nia liman, maibé bainhira konfirma, PSIK rekuza atu fó informasaun.

“Horseik (Kuarta) kolega jornalista balun mai atu konfirma kazu ne’e mós ha’u lakohi fó kometariu ruma, husik ida ne’e rai ba segredu justisa, husik prosesu ba ministeriu publiku fika ba segredu justisa,” deklara Adjuntu Diretór PSIK, Adino Cabral.

Biografia Badak Padre Abito

Padre Abito José Brites Casimiro, moris iha Aldeia Ailelo, Suku Giolima, Postu-Administrativu Hatolia, Munisipiu Ermera iha 6 Fevereiru 1985. Oan husi Zeferino Casimiro no Saturnina Martins.

Padre Abito nu'udar oan dalima husi maun alin nain 10; Aurélia Mascarinhas, Fernanda Mascarinhas, Augusta Martins (matebian), Olinda dos Reis, Adelina Martins, Irmã Olandina Casimiro Mascarinhas, Bernadino Soares Casimiro, Boby Casimiro (matebian) no Celeste Soares Casimiro (matebian).

Iha 6 Jullu 1986, Abito simu sakramentu Batizmu husi Padre Mario do Carmo Belo (matebian), iha misaun antiga Igreja São Francisco Xavier Hatolia.

Iha 18 Setembru 1993, simu sakramentu primeira komunão husi Padre Mario do Carmo Belo, iha Igreja São Francisco Xavier, Nartuto.

Iha Tinan 1993-1996, Abito hala’o nia estudu iha SDN númeru 58 Tata Ailelo hafoin muda ba SDN nú 30 Garuda Hatolia.

Iha tinan 1996-1997, Abito labele kontinua nia estudu tanba hetan presaun no tortura husi militar Indoneziia, nune’e iha tinan 1997-1998 nia foin hala’o hikas nia estudu iha SDN nú. 58 Tata Ailelo.

Iha Maiu 1998 tanba situasaun funu, Abito ho família halai ba hela iha ailaran Sosiedade Fatubesi to’o tinan 1999.

Iha tinan 2000-2003, Abito hala’o hikas nia estudu Pre-Sekundária iha eskola Públika Loron 20 Fulan Setembro, Hatolia.

Iha 2003-2006, Abito kontinua nia estudu iha Escola Público 10 de Dezembro, Komoro, Dili no iha tempu hanesan ajuda mós Programa História ba Futuro, iha Casa de Produção Audio Visual (CPA), Xina-Rate, Taibessi, Dili.

Iha 23 Setembru 2006, Abito hahú nia estudu iha Seminário Menor Nossa Senhora de Fátima, Balide, to’o Jullu 2007.

Iha 4 Outubru 2007 to’o 4 Agostu 2009, Abito hala’o nia estudu iha Seminário Ano Propeudêutico ou Ano Espiritualidade São João Maria Vianney, Bekora.

Iha 27 Setembru 2009 to’o 30 Outubru 2016, kontinua nia formasaun ba vida sacerdote nian iha Seminário Maior Interdiocesano São Pedro no São Paulo, Fatumeta, Dili.

Iha tinan 2009 to’o 2013 hasai kursu lisensiatura Filozofia iha Instituto Superior Filosofia e de Teologia Dom Jaime Garcia Goulart, Fatumeta, Dili, ne’ebé konklui ho traballu konkluzivu ho título A Ética Segundo Santo Agostinho.

Iha tinan 2015-2016 hasai kursu lisensiatura Teologia iha Instituto Superior Filosofia e de Teologia Dom Jaime Garcia Goulart, Fatumeta, Dili, ne'ebé konklui ho traballu konkluzivo ho título A Esperança do Novo Céu e a Nova Terra, segundo o livro Apocalipse Capítulo 21:1-8.

Iha 29 Juñu 2013, Abito simu Ordem Leitorado no Acolitado, iha Seminário Maior  Interdiocesano São Pedro no São Paulo, Fatumeta, husi Bispo Dom Norberto do Amaral (Bispo Diocese Maliana) iha festa Solenidade São Pedro no São Paulo nia loron.

Iha 6 Novembru 2013 to’o 8 Janeiru 2015, hala’o Pastoral Filosofia nian iha Centro Publicação da Diocese Dili ou SEARA, Casa de São João Paulo II Lecidere. Iha tempu hanesan hala’o mós Assistência Pastoral iha Paróquia Santa Teresinha do Menino Jesus, Bedois.

Iha 8 Janeiru 2017 to’o 18 Janeiru 2018, hala’o Pastoral Teologia nian iha Emissora Católica Radio Timor-Kmanek Lian Na’i Feto, Maloa, Ailok-Laran, Dili. Iha tempu hanesan tulun mós iha kapela Monumento São João Paulo II, Tasi-Tolu no tulun mós iha Programa Roman Domin, iha RTTL.Ep.

Iha 19 Janeiru 2018, halao Pastoral Pre-Diácono nian iha Parokia Santo António, Motael Dili.

Iha 19 Marsu 2017, iha loron Solenidade São José Esposo de Virgem Santa Maria, Abito simu ordenação Diaconal husi Dom Virgílio do Carmo da Silva, Bispu Dioseze Dili iha Sé Catedral Dili no kontiua hala’o pastoral diákonal nian iha Parokia Santo António, Motael.

Iha 27 Novembru 2018, Abito simu Ordenasaun Sacerdotal husi Dom Virgílio do Carmo da Silva, Bispu Dioseze Dili iha Igreja Paróruia Nossa Senhora da Graça, Gleno, Ermera no lema ba Nai-lulik nian mak “Ha’u Nunka Haluhan Ó” foti husi livru profeta Izaias 49.15

Iha 2019 to’o 2022 hala'o kna'ar nu'udar Economato iha Seminário Maior Interdiocesano São Pedro no São Paulo, Fatumeta, Dili.

Iha 22 Agostu 2022, Padre Abito nia viajen iha mundu ne’e remata.