Tuir Diretor Jeral Finansas MEJD, Antoninho Pires hateten, parseria ne'e ba tinan rua hodi suporta implementasaun ne’ebe efetivu ba programa ekstra-kurikular no halo ligasaun ho respeitu no sesaun posititivu ho inan-aman.

Programa ne’e sei hala’o ba iha eskola 45 iha munisipiu hitu (7) hanesan, Ermera, Bobonaro, Vikeke, Kovalima, Baucau, Dili no Rejiaun Administru Espesial Oekuse Ambeno.

“Ohin ita asina akordu ne'e mós atu hare ba programa igual Jeneru ninian, no mós atu hare ba prevensaun violensia bazeia ba jeneru iha Eskola sira," dehan nia iha Ótel, Novu Turizmu, kuarta (24/08).

Nia hatutan, MEJD kria parseira ho UN Women ne'e hanesan parte ida husi aprosimasaun eskola nian ba prevene violensia bazeia ba jeneru.

Nune’e, atu kolabora no empodera manorin no komunidade eskola sira, liu husi utiliza instrumentu kurikulu, halo ligasaun ho respeitu ne’ebé dezenvolve husi UN Girl’s Education Initiative atu prevene, hatan no responde efetivamente ba diskriminasaun jeneru no violensia hasoru feto no labarik feto sira.

Nia dehan, ensino aprendijazem ne’e atu forma atitude no komportamentu efikativu ba estudante sira no suporta manorin sira iha area edukasaun no mós atu kria ambiente aprendijazem ida ne’ebe seguru.

Tanba ne’e, halo parseria ho parseiru sira atu dezenvolve komunidade nia komprensaun hodi suporta, dezenvolve lideransa ba kria ambiente ida ne’ebé sensivel ba regulamentu sira.

Tuir nia, kurikulu ne’e bazeia ba evidensia ba prevensaun, mudansa ba norma jeneru no intervensaun sira iha baze no  iha rejiaun Azia Pasifiku no mós iha rejiaun seluk.

Tanba ne'e kompremisiu bo'ot sira ba elimina diskriminasaun hasoru feto no labarik feto sira, nia dehan, sei foti asaun liu husi inklui mensajem no atividade ne’ebé integra abordajem jeneru no halo relasaun ho respeitu, hanesan parte ida husi ministeriu nia reformasaun ba kurikun edukasaun ensinu baziku ne’ebé hahú ona iha tinan 2013 to’o 2015.

Nia salienta tan, MEJD no UN Women servisu hamutuk dezde 2014 ba promosaun igualdade jeneru aliña ho ministeriu nia kompremisiu ba igualdade jeneru no obrigasaun ne’ebé tutela iha Planu Asaun Nasional Violénsia Bazeia ba Jeneru (PAN-VBJ).

Ho nune’e, MEJD ho UN Women espera katak, bele fortifika kolaborasaun diak hodi hametin no garantia igualdade ba ema hotu iha ambiente eskola nian..

Garantia ema hotu-hotu nia direitu atu labele husik ema ida iha kotuk, partikularmente estudante sira nia ben-estar.

Iha Fatin hanesan, Ofisial UN Women, Amy Nishtha Satyam, hateten, kria parseria hamutuk ho MEJD ne’e atu haree ba labarik sira, liu-liu atu hapara violensia bazeia ba jeneru iha ambiente eskola nian.

Tanba ne’e, UN Women hein katak liu husi asina akordu bele iha kolaborasaun diak liu tan no iha kompremisiu ne’ebé forte ba implementasaun programa prevensaun hotu iha eskola no asegura instituinalizasaun husi programa halo ligasaun ho respeitu.

“Liu husi parseria ne’e, ita bele ajuda estudante, inan-aman, no manorin sira ba moris ida ne’ebé livre husi violensia iha eskola, iha uma no iha sira nia komunidade,” nia dehan.

Ho nune’e, nia hatutan, sei esforsu hodi haforsa liu tan parseria ho MEJD hodi servisu hamutuk haree ba violensia kontra labarik sira ne'ebe hasoru risku iha ambiente eskola.