Nia konta, Veteranu sira oras ne’e ida-idak husik ona mundu, Saudozu Samba mate la’ós derrepente de’it, maibé tanba sofre moras husi konsekuénsia funu hanesan mós ho veteranu sira seluk.

“Ha’u sujere de’it ba governu liuliu Sekretáriu Estadu Veteranu atu labele haree de’it ba rejistrasaun, maibé buka meius liga ba Ministériu Saúde atu kada fulan rua ka tolu tuun ba iha terrenu hodi buka tuir veteranu sira ne’ebé moras hela sira ne’ebé, iha Dili ne’e mak ita hatene maibé iha munisípiu ne’e oinsá,” dehan nia.

Veteranu sira ne’ebé dezmobilizadu iha 1999 iha Aileu hodi sai vida sivíl no ohin loron hela iha Aldeia, Suku, Postu Administrativu no Munisípiu sira oinsá loos ho sira, la kleur sai iha média veteranu ida mate iha fatin ne’e, iha fatin ne'ebá.

Tanba ne’e, Governu iha responsabilidade morál hodi buka mekanizmu oinsá atu kontrola sira-nia saúde rotinamente, tanba sira ne’e sai hanesan patrimóniu Estadu nian presiza tau matan ba sira.

Bainhira Governu trata sira ho dignu ne’e sai hanesan onra boot ida iha sira nia moris. Labele fó onra ba sira iha bainhira sira mate ona hafoin halo omenajen no lori sira ba iha jardín eroi.

Iha fatin hanesan, Vise Presidente PN, Maria Angelina Sarmento hateten, preokupasaun kona-ba kondisaun saúde veteranu sira nia ne’e presiza tebes atu tau atensaun sériu. Maibé atu ezekuta ne’e Ministériu Saúde no Sekretáriu Estadu Veteranu mak iha kompeténsia atu jere.

“Parlamentu sei enkamiña preokupasaun ida ne’e ba governu atu halo planu presiza identifika veteranu no kombatente sira ninia estatutu saúde ne’e oinsá,” dehan nia.

Bainhira iha identifikasaun saúde haree aman veteranu sira-nia saúde, hatudu moras kaman ka todan sá medida mak Governu tenke halo ba sira atu sira bele sente duni Estadu ne’e valoriza sira iha ukun aan.