SIdadaun na’in 11 husi Oekusse ne’e halo falsifikasaun dokumentus hodi rejistu sai nu’udar veteranus iha tinan 2003.

Ministru Asuntu Kombatente Libertasaun Nasional, Gil da Costa Monteiro ‘Oan Soru’ deklara ninia apresiasaun ba desizaun ne’ebé tribunal Oekusse iha 13 Janeiru liu ba.

"Ha'u hakarak fó apresiasaun ba Tribunal Oekusse hasai desizaun ba kazu falsifikasaun balun,” dehan Ministru liu husi konferensia imprensa iha edifisiu MAKLN, Komoro, Kinta (13/02).

Ho desizaun ne’ebé tribunal foti ne’e, sidadaun na’in 11 tenke devolve fila fali osan kuaze rihun $300 resin.

"Ba ema na'in 11 ne'ebé mak tribunal deside, anunsia ona, sira sei fó fila fali konpensasaun osan ne'ebé durante sira simu ba fali kofre estadu. Husi ema na'in 11 ne'e ema ida (1) mak sei fó fila fali $31 mill, no ema na'in 10 ne'e kada ema ida sei devolve $27 mill,” informa Oan Soru.

Tan ne’e, Ministru ne’e apela ba sidadaun hotu-hotu atu di'ak liu labele inventa sasan ka falsifika dokumentus.

"Di'ak liu lalika koko atu inventa sasan iha rai ida ne'e, tanba Timor-Leste ne'e ki'ik no klot. Hateten buat ne'ebé loos, hateten ita-boot nia partisipasaun, se kastigu karik tenke hateten loos tanba ema barak duun todan ba Kodim, Koramil, la'os kastigu hotu, lae, maibé ema barak sofre, balun losu ain kukun, liman kukun maibé ba sira ne'ebé la hetan kastigu lalika inventa katak hetan hotu kastigu," nia dehan.

Ministru ne’e apela ba sidadaun balun ne’ebé koko falsika dokumentus atu hetan asessu ruma husi estadu atu hapara, tanba ne’e krime.

“Karik sente an hanesan ne'e, di'ak liu lalika, tanba ida ne'e konsikuensia boot no todan. Osan $31 mill no $27 mill ne'e la'os fasil, tanba ida ne'e lei hahú kedas husi Ministru tuun to'o kraik."

“Sasin sira sei tuir mai tanba iha sasin mak asina dokumentus ne'e. See-see mak asina tenke bolu ba tribunal hodi idaidak ba justifika,” dehan Ministru ne’e.