Ministru Interior (MI), Francisco da Costa Guterres hatete, Konsellu Ministeriu aprova ona rezolusaun ida no hein publikasaun iha Jornál Repúblika atu bele hahú ona halo rekrutamentu ba kadetes PNTL foun 500, kompostu husi ajente na’in 400 no ofisiais na’in 100.
MI, nia dehan, halo koordensaun ho Komandu PNTL hodi estabelese komisaun rekrutamentu ne’ebé sei envolve Guarda Nasionál Repúblika (GNR) Portugál hodi monitoriza no superviziona atu nune'e prosesu hotu tenke la'o transparánsia no labele mosu familiarismu ka hili malu.
"Ekipa komisaun estabelese ona, agora hein diploma legal husi ha'u halo despaixu ona mak posibilidade ita iha fulan Marsu hahú ona halo rekrutamentu kadetes PNTL foun na’in 500," dehan Ministru Francisco ba jornalista sira hafoin reuniaun Konsellu Ministru (KM) iha Palasiu Governu, Kuarta (12/02).
Kona-ba kriteriu ba rekrutamentu, nia dehan, daudaun ne'e sei halo diskusaun kona-ba kriteria ba kadetes foun.
"Kriteriu sira ne'e ita agora diskute hela, atu define idade joven sira ne'ebé tama iha insituisaun PNTL husi ajente ne'e hira no ofisiais ne'e idade hira. Ita tenke haree nesesidade sira ne'e hotu mak deside. Ita hanoin iha fulan Marsu nia laran iha ona diploma legais ita prontu hahú halo prosesu rekrutamentu kadetes PNTL foun."
"Diploma legais ho kriteriu sira tenke estabelese haree ba kuota feto, depois ita diskute mós kona-ba jerasaun patriota tama iha rekrumentu, tenke haree sira atu haree sira-nia inan-aman uluk luta iha ai laran tenke tau mós atensaun ba oan sira," dehan nia.
Aleinde ne’e, nia hatutan, kriteria seluk mak haree mós ba envolvimentu iha grupu artemarsiais.
"Joven ne'ebé artemarsiais tenke hasai deklarasaun onestu, labele bosok, bainhira tama ona insituisaun PNTL husik organizasaun, mai ona iha PNTL sira tenke serbí de'it ba povu no nasaun," katak nia.
Molok ne'e, Komandante Jerál Polísia Nasionál Timor-Leste, Komisariu Jerál Polísia Henrique da Costa hatete, prosesu rekrutamentu kadetes PNTL foun ne'e kompetensia MI nian.
Nia dehan, Komandu PNTL hakarak rekrutamentu kadetes foun PNTL tenke transparánte ba ema hotu, tanba ne'e husu ba ekipa traballu PNTL ho MI ho parseiru GNR ne'ebé apoiu iha prosesu rekrutamentu tenke transparante duni.
"Ba ha'u ema see de'it mak liu iha selesaun tama iha Instituisaun PNTL ne'e laos kompetensia Komandu PNTL, mais iha hakarak mak iha tinan ida ne'e tenke iha duni rekrutamentu kadetes PNTL foun par halo servisu, maibé tenke transparánsia ho akuntavel," katak nia.
