Xefe Seksaun Relasaun Externa Autoridade Protesaun Sivil, Nelson Orlean Nunes hatete, tipu dezastre ne’ebé akontese mak hanesan, anin boot no mós ahi-han, ne’ebé rejulta komunidade nia uma, iha 36 mak hetan estragus.

Uma 36 ne’ebé hetan estragus mai husi Munisipiu sira hanesan, Bobonaro, Covalima, Dili, Ermera, Likísa, no Vikeke.

“Númeru ema afeitadus hamutuk na’in 179 no uma ne’ebé hetan estragus hamutuk 36. Husi númeru uma 36 ne’e mai husi Munisipiu Bobonaro anin sobu uma lima, Covalima anin sobu uma ida, ahi han uma ida, Dili, anin sobu uma ida, ahi han uma ida, Ermera anin sobu uma tolu, Likísa anin sobu uma sia, kanek 2 no lakon ida, Munisipiu Vikeke anin sobu uma 14 no ahi han uma ida,”dehan Xefe Seksaun Relasaun Externa Autoridade Protesaun Sivil, Nelson Orlean Nunes, liu husi konferensia imprensa ne’ebé halo iha sala konferensia APC, Kaikoli, Dili, segunda ne’e (17/02/25).

Nia hatutan, vitima afeitadu hirak ne’e, Komando Autoridade Protesaun Sivil ho Parseiru relevante sira fornese ona apoia emerjensia hanesan apoia ai-han no la’os aihan.

Aleinde, Komando Operasional Autoridade Protesaun Sivil Munisipiu sira, sei kontinua halo hela levantamentus detaillus kona ba sasan ne’ebé hetan estragus no lakon.

Ba apoiu rekuperasaun, Xefe Seksaun ne’e afirma, Autoridade Protesaun Sivil sei halo levantamentus dadus hodi indentifika tipu uma ne’ebé hetan estragus hafoin bele fó apoiu rekuperasaun.