"Hau disaponta ho menus profesores ou profesoras ne'ebe afeita atividade aprendizajen iha eskola sekundáriu 4 UNAMET ," Dehan Vise Diretór Eskola Sekundariu 4 UNAMET iha nia knaar fatin Balide Dili iha Sesta-feira ( 02/02).
Nia esplika, desisaun Minsteriu Edukasaun ne’e parte polítika Governu maibé espera katak iha tempu tuir mai ou iha futuru sei iha kolokasaun manorin na’in tuir polítika Ministériu Edukasaun, nia dehan.
Nia relata, ho kolokasaun mestre foun mai iha eskola sekundáriu 4 UNAMET iha futuru sai solusaun ba problema menus profesór sira iha eskola refere ho nune’e husi parte eskola sei esforsu oinsa atu solusiona problema menus manorin sira.
“Agora dadaun ne'e profesores no profesora sira iha eskola sekundariu 4 UNAMET hamutuk ho total 98 no depoizde desisaun formal hasai husi Ministériu Edukasaun hasai profesores e profesoras kontratadu nain 12 ho voluntariu 2 antaun agora dadaun ami menus ona kuaze nain 14 mak hapara ona hanorin iha eskola refere,” nia esplika.
Maibe nia deklara katak antes ami hamutuk nain 112 manorin antes desisaun formal husi Ministériu Edukasaun prosesu aprendisajen la’o efikás liu mesmu agora menus ona maibé esforsu nafatin katak prosesu aprendizajen lao mantein hela.
Maibé tanba polítika Governu mak halo sai nune'e hola asaun ne'ebe favorável no sustentável hodi mantein implementasaun programa aprendizajen ho efetivu ou mantein hodi hein solusaun bazeia ba polítika Guvernu husi Ministériu Edukasaun.
Iha fatin hanesan estudante ho naran Marciana Ximenes dehan, ba Jornalista INDEPENDENTE katak nia senti triste teb tebes ho problema menus profesor ne'ebé sai polémika iha teritóriu sai hanesan problema nasionál tanba ne'e nia husu ba Ministériu Edukasaun no parte relevante hotu hodi foti aktus konkreta no apropriadu hodi solusiona problema menus profesors iha rai laran.