"Moras fuan ne'e sai preokupasaun boot ba sosiadade timorense. Ema barak hetan moras ne'e la'ós de'it atakasaun fuan, maibé mós stroke. Ne'e moras ne'ebé presiza iha duni ekipamentu iha Hospital Nasionál Guide Valadares atu atende tratamentu ba ida ne'e," dehan Diretór Ezekutivu AJAR, José Luís de Oliveira, iha knaar fatin, Faról, horisehik.

Tuir nia, bainhira depende de’it ba rai-li’ur, rekursu finanseiru sei la sustentavel. Governu iha tinan hirak liu ba dehan instala sentru kardiaka ida iha Oekussi ho intensaun atu sai sentru ba tratamentu kardiatiku iha rejiaun Ázia.

Maibé, liu tinan ida la hatene progresu ne'e sai saida, investimentu barak ne'ebé sira halo ba hotu ne'ebé la hatene. Ne'eduni, tenke halo avaliasaun ba programa governu sira durante ne'e falla iha ne'ebé, labele bainhira mosu buat ruma mak foin hakfodak hanesan Covid-19 mak foun foin hakfodak.

Governu tenke iha duni planu to'o tinan hira bele iha ona sentru ba tratamentu moras kardiatiku sira ne'e hodi bele halo tratamentu iha rai-laran.

"Mudansa governu afeta tebes sustentabilidade ba programa sira ne'e, dala-ruma kauza husi parte ne'e… instalasaun servisu públiku sira ne'e ladun dezenvolve ho di'ak. Dala-ruma ita haree mosu ba klínika partikular sira mak komesa iha fasilidade hanesan ne'e," hatete nia.

Hanesan agora daudauk Klínika Fatumea mak iha fasilidade sira hanesan ne'e, tuir loloos estadu mak tenke iha uluk, haruka ema ba eskola, aproveita ema sira ne'ebé ba eskola, kria kondisaun ba sira, seguransa sosiál ba médiku sira ne'e tenke iha, saláriu tenke iha hodi halo ema atu dedika aan ba servisu públiku, lae sira la konsentrasaun ba servisu públiku.

"Tuir ha'u-nia observasaun governu seidauk útiliza rekursu umanu ho didi'ak, dala barak sira abandonadu fali, tanba ne'e mak sira balun ba fali servisu iha klínika privadu sira ne'e," tenik nia.

Molok ne'e, Xefe Unidade Klínika Emerjensia HNGV, Luciana Celeste Amaral hateten, kada loron pasiente ho moras fuan barak liu na'in tolu mak tama sala emerjensia. Husi númeru ne'e ita rejista kada fulan ema na'in 10 ba leten mai ho kazu mate ba pasiente sira ho moras fuan iha departamentu emerjensia.