"Ita hatene katak pagamentu ba idozu sira iha tinan ida ne'e halo daruak, agora ba tinan 2022 tenki selu iha Juñu nia laran," Prezidente INSS, Longuinhos Armando hateten ba jornalista INDEPENDENTE iha knaar Kaikoli, Kuarta (11/05).
Agora aumenta pagamentu ba idozu ho osan $50 kada fulan, tanba uluk $30 enkuantu liu husi Parlamento Nasional aprova tan orsamentu ba tinan 2022 aumenta tan osan $50.
"Ne'ebe agora hahu ona selu ho osan $50, maibe ita presiza altera lai ba dekretu lei ba ferik no katuas sira," nia tenik.
Agora daudaun dekretu lei ne’e lori ona ba Ministeriu Solidariedade Sosiál Inkluzaun (MSSI) no lori ba Konsellu Ministru (KM), maibe Konsellu Ministru aprova ona nune’e hein implementa de’it ona iha fulan Juñu.
Prosesu pagamentu INSS servisu hamutuk ho BNCTL iha Munisipiu balun, ezemplu Dili BNCTL komesa kria ona ATM ida ne'e ba ferik no katuas sira hodi nune'e balun bele foti direita iha Banku la presiza ona ba sede suku.
Pagamentu direita sei halo iha suku-suku sira, ne'ebé ba postu adminitrativu no munisipiu sira ne'ebé seidauk asesu ba ATM.
Ba orsamentu tinan ida ne'e ba ferik no katuas sira aprova kuaze orsamentu montante millaun $35-resin no faze daruak nian, faze dahuluk ho orsamentu millaun $17 -resin no mós ba faze daruak ho millaun $17 -resin karik restu sei fo fila ba Estadu.
Enkuantu rejistu ba idozu hamutuk 100,000 pesoa, maibé hare'e ba tinan 2021 ne'e kuaze 93.000-resin ba ferik no katuas inklui ema ho defisiensia sira.
Iha tinan 2022 nia dadus ba ferik katuas no ema ho defisiensia halo apresia no aumenta tan ne'e mak bele sae ba 100.000, ho ema ho defisiensia hamutuk 9.000-resin.
